Ինչպես այսօր հայտարարել է Հավաքական անվտանգության պայմանագրի կազմակերպության (ՀԱՊԿ) ղեկավար Նիկոլայ Բորդյուժան՝ ելույթ ունենալով ՌԴ դաշնային խորհրդում, ՀԱՊԿ-ը կողմ է ահաբեկչության, զանգվածային ոչնչացման զենքի տարածման և թմրանյութերի դեմ պայքարում, ինչպես նաև բնական և տեխնածին աղետների հետևանքների վերացման գործում ՆԱՏՕ-ի հետ գործնական համագործակցությանը:
«Այն, որ արևմտաեվրոպական ուղղությամբ ՀԱՊԿ-ի և ՆԱՏՕ-ի սահմանները մոտենում են, չի կարող չմտահոգել մեզ: Ակնհայտ է, որ գնում է սպառազինությունների մրցավազք, լարվածության աստիճանի բարձրացում և անվստահության աճ»,- ասել է Բորդյուժան: Այս մասին փոխանցում է РИА-Новости գործակալությունը:
Նա ասել է, որ լարվածությունը կարող է թուլանալ ՌԴ-ի ու ՆԱՏՕ-ի և ՀԱՊԿ-ի ու ՆԱՏՕ-ի միջև համագործակցության ամրապնդման դեպքում:
Խոսելով Անդրկովկասի մասին՝ նա նշել է, որ վիճակի կայունացմանը չեն նպաստում «վրացական ղեկավարության դիրքորոշումը, նրա գործողությունները հակառուսաստանյան հիստերիան լարելու, ինչպես նաև արևմտյան պետությունների աջակցությամբ ռազմական ներուժի մեծացման ուղղությամբ»: Բորդյուժան նաև մտահոգություն է հայտնել Ադրբեջանի ռազմական բյուջեի «անհամաչափ» աճի վերաբերյալ: