Տաջիկաստանի նախագահ Էմոմալի Ռահմոնը ժամանել է Բաքու եւ հանդիպում է Ադրբեջանի նախագահ Իլհամ Ալիեւի հետ: Ուշագրավն այս այցի առումով թերեւս այն է, որ Ռահմոնը Բաքու է ժամանել Թեհրան մեկնելուց անմիջապես հետո: Նախօրեին նա Թեհրանում մասնակցել է Իրանի նախագահ Իբրահիմ Ռեյիսիի թաղման արարողությանը: Արդյո՞ք Ռահմոնը Թեհրանից հարցեր է տարել Բաքու: Ինչ խոսք, Ադրբեջանն ու Տաջիկստանը ունեն երկխոսության լայն օրակարգ, սակայն հանգամանքը, որ Տաջիկստանի նախագահը Բաքու է մեկնում Թեհրանում հանգուցյալ նախագահի հուղարկավորության արարողություններից հետո, բավականին նշանային է:
Ինչպես հայտնի է, Ռեյիսիի ուղղաթիռը կործանվեց հենց Իլհամ Ալիեւի հետ նրա սահմանային հանդիպումից ժամեր անց՝ դեպի Թավրիզ վերադարձի ճանապարհին: Ըստ ներկայումս եղած տեղեկությունների, կործանման պատճառը եղել է տեխնիկական, թեեւ շատ դժվար է ասել, թե արդյո՞ք իրապես դա է բուն պատճառը, կամ արդյո՞ք տեխնիկական պատճառի «ծագումը» այսպես ասած չունի որեւէ այլ պատճառ կամ մոտիվ: Այս հարցերը թերեւս կքննարկվեն մշտապես, անկախ պաշտոնական վարկածներից, որովհետեւ մեղմ ասած դժվար է պատկերացնել, որ Թեհրանը անգամ այլ պատճառ պարզելու դեպքում հանրայնորեն կներկայացնի դա: Նրբերանգները շատ են:
Իլհամ Ալիեւը չնայած նրան, որ աղետից ժամեր առաջ էր հանդիպել Ռեյիսիի հետ, չմեկնեց Թեհրան՝ նրան վերջին հրաժեշտը տալու համար: Արդյո՞ք Ալիեւը համարել է, որ ինքը հենց սահմանին է «վերջին հրաժեշտը» տվել Իրանի նախագահին: Թե՞ Ալիեւը կարծում էր, որ հուղարկավորության համար Իրան մեկնելու պարագայում նրան այնտեղ կարող էր սպասել բավականին տհաճ խոսակցություն, կարող էին սպասել բավականին անհարմար հարցեր, կապված հենց այն հանգամանքի հետ, որ Ալիեւն էր «վերջին մարդը», ում հանդիպել էր Իրանի նախագահը աղետից առաջ: Ընդ որում, Ալիեւի պարագայում կարծես թե ձեւավորվում է որեւէ աղետից առաջ «վերջին մարդ» լինելու օրինաչափություն: Նա «վերջին մարդն» էր, ում օրինակ հանդիպեց ՌԴ նախագահ Պուտինը 2022 թվականին՝ ուկրաինական պատերազմը սկսելուց առաջ, Մոսկվայում նրա հետ կնքելով դաշնակցային հռչակագիր:
