Այսօր «Պահպանենք Թռչկանի ջրվեժը» նախաձեռնության ակտիվիստները և երիտասարդները Հրազդանի երկաթահանքում ծանոթացել են տարածքի իրավիճակին:
Հրազդանի երկաթահանքում են եղել քաղաքացիական ակտիվիստներ Մարիամ Սուխուդյանը, Եղյա Ներսիսյանը, Միքայել Էլիզբարյանը, Հասմիկ Մարտիրոսյանը և այլք:
«Մենք գնացել էինք տեղում իրավիճակին ծանոթանալու. որևէ բռնություն կամ ագրեսիով գործողություն չենք ձեռնարկել»,- մեկնաբանեց Հասմիկ Մարտիրոսյանը`հավելելով, որ տարածքը, ուր մտել են, որևէ ձևով ցանկապատված կամ փակված չի եղել:
Երբ երիտասարդները մոտեցել են հանքին և սկսել ուսումնասիրել տեղանքը, որտեղ հորատման աշխատանքներ են կատարել, տեղի երկրաբանները ոստիկանություն են զանգել և ահազանգել, որ իրենց անվտանգությանը սպառնում են: 5 րոպե անց ոստիկանությունը ժամանել է: Երիտասարդները խոսել են Ներսիսյան ազգանունով ոստիկանի հետ և համաձայնության են եկել`ասելով, որ եկել են ընդամենը իրավիճակին ծանոթանալու:
Նախաձեռնության ակտիվիստները «Առաջին լրատվական»-ին տեղեկացրին, որ իրենցից պահանջել են հեռանալ տարածքից, այնուհետև առաջարկել են նստել իրենց մեքենան: Երիտասարդ ակտիվիստները, սակայն, ոստիկանության աշխատողների հետ համաձայնության գալով, ծանոթացել են իրավիճակին:
Հասմիկ Մարտիրոսյանը նաև ասաց, որ «Պահպանենք Թռչկանի ջրվեժը» նախաձեռնության անդամները շարունակելու են պայքարել բնապահպանական խնդիրները բարձրաձայնելու և լուծելու համար: