Նիկոլ Փաշինյանը կառավարության հնգամյա ծրագիրը խորհրդարանում ներկայացնելիս խոսել է Հայաստանի առջև ծառացած ու չլուծված բազում հարցերի մասին։ Փաշինյանի ելույթում կարմիր թելի պես անցնում էր հետևյալ միտքը․կառավարությունը ստանձնում է տարածաշրջանի համար խաղաղ դարաշրջան բացելու իր բաժին անելիքը։ Այս համատեքստում ամենակարևորը, ըստ վարչապետի, Հայաստանի և Արցախի անվտանգության ապահովումն է։ Հաշվի առնելով այսօրվա գործընթացները, սրանք որքանո՞վ են համադրելի։ Քաղաքագետ Էմիլ Օրդուխանյանը այս հարցի պատասխանն ունի, ասում է՝ քանի դեռ ադրբեջանցի զինվորները ՀՀ տարածքում են, դրանք անհամադրելի գործընթացներ են։ «Իշխանության պատկերացրած խաղաղությունը աճուրդային է և խարխուլ»,-հավելում է քաղաքագետը։