Ձմեռային դադարից հետո VBET Պրեմիեր լիգան վերսկսվեց։ Վերսկսվեց գեղեցիկ և դիտարժան պայքարով։ Առաջնության հենց մեկնարկից թեժ պայքար է ընթանում մրցաշարային աղյուսակի վերին հատվածում։ Ունենք 4-5 թիմեր, որոնք չեմպիոնի կոչման իրական հավակնորդ են և խաղամակարդակով ըստ էության հավասար։ Խոսքը վերաբերում է գործող չեմպիոն «Արարատ-Արմենիային», Երևանի «Արարատին», Վանաձորի «Լոռիին», «Նոային» և «Ալաշկերտին»։ Այս պահին առաջին հորիզոնականում Երևանի «Արարատն» է, որը 11 խաղում վաստակել է 21 միավոր։ Նույնքան միավոր ունի նաև երկրորդ հորիզոնականում գտնվող «Արարատ-Արմենիան», որը, սակայն, մեկ հանդիպում ավելի քիչ է անցկացրել։ Երրորդ տեղում գտնվող «Լոռին» 11 խաղում վաստակել է 20 միավոր։ «Նոան», որը 12 խաղում վաստակել է 19 միավոր, 4-րդն է։ Լավագույն հնգյակը եզրափակում է «Ալաշկերտը», որը 10 խաղում վաստակել է 18 միավոր։
Մրցակցությունն իսկապես լարված է։ Երեկ Երևանի «Արարատը» հյուրընկալելիս 2։0 հաշվով առավելության հասավ «Ուրարտուի» նկատմամբ։ Առաջատարը ցուցադրեց գրագետ և դինամիկ ֆուտբոլ։ Գեղեցիկ գոլով աչքի ընկավ Մորի Կոնեն, որը խփեց նաև «Արարատի» երկրորդ գնդակը։ Որակյալ ֆուտբոլ ցուցադրեց նաև «Արարատ-Արմենիան», որը 2։1 հաշվով առավելության հասավ «Փյունիկի» նկատմամբ։ Իր նորամուտի խաղում շքեղ գոլի հեղինակ դարձավ Հայաստանի ազգային հավաքականի հարձակվող Ալեքսանդր Կարապետյանը։ Վերջինս ձմեռային տրանսֆերային պատուհանի ընթացքում էր պայմանագիր կնքել երևանյան ակումբի հետ։ Կարապետյանի պես ֆուտբոլիստների ներկայությունն, ինչ խոսք, էլ ավելի դիտարժան է դարձնում մրցաշարը։ «Նոան» իր հերթին 4։0 հաշվով առավելության հասավ «Վանի» նկատմամբ։ Վերջինս տպավորիչ մեկնարկից հետո զգալիորեն զիջել է դիրքերը։ Հիշեցնենք, որ ձմեռային դադարի ընթացքում «Վանի» մարզչական շտաբում և կազմում տեղի են ունեցել էական փոփոխություններ։ Վանաձորի «Լոռին» լարված պայքարում 1։0 հաշվով առավելության հասավ «Շիրակի» նկատմամբ։ Հաղթական գոլը «Լոռին» խփեց մրցավարի ավելացրած 3-րդ րոպեին։
Չնայած կորոնավիրուսի համավարակը լուրջ խոչընդոտներ է ստեղծել ակումբների համար, այնուամենայնիվ առաջնության մասնակից թիմերը մեծ հաշվով շարունակում են մնալ իրենց բարձրության վրա։ Համենայնդեպս, տեղի ունեցած 4 հանդիպումներում խաղային դինամիկայի հետ կապված խնդիրները, այսպես ասած, աչք չէին ծակում։
Առաջնության գլխավոր խնդիրը շարունակում է մնալ մրցավարությունը։ Ավելի ստույգ, գրեթե յուրաքանչյուր տուրում ակումբների կողմից դժգոհություններ են հնչում մրցավարների գործողությունների հետ կապված։ Այս անգամ մրցավարության հետ կապված իր դժգոհությունն է հայտնել Երևանի «Փյունիկի» սեփականատեր Արթուր Սողոմոնյանը։ «Փյունիկ» ակումբի ֆեյսբուքյան էջում Սողոմոնյանը հանդիպման գլխավոր մրցավար Արտեմ Գասպարյանին մեղադրել է «Արարատ-Արմենիայի» օգտին աշխատելու մեջ։ Ավելին, Սողոմոնյանը նշել է, որ «Արարատ-Արմենիայի» գլխավոր տնօրեն Պողոս Գալստյանը Ռուսաստանում հայտնի է մրցավարների հետ աշխատելով և էլի այլ կեղտոտ գործերով։ «Ես շատ տխրում եմ, որ նա այդ ամբողջ կեղտը իր հետ բերել է Հայաստան»,- գրել է Սողոմոնյանը։
Տեղի ունեցածը կարելի է միանգամայն արտառոց երևույթ համարել։ Փաստորեն, հայկական ամենահայտնի ակումբներից մեկի սեփականատերը մեկ այլ ակումբի գլխավոր տնօրենին ըստ էության մեղադրում է սպորտային հանցագործության մեջ։
Բնական է, այս ամենը տեղի չէր ունենա, եթե Հայաստանի առաջնությունում մրցավարությունը լիներ նորմայի շրջանակներում։ Ցավոք, նման երևույթները ոչ միայն ստվեր են գցում հայկական ֆուտբոլի վրա, այլև խաթարում են առողջ մրցակցությունը։ Հայաստանի վերջին առաջնությունները ավարտվում են սկանդալներով։ Երկու տարի առաջ մրցավարների կոպիտ սխալի հետևանքով նույն «Փյունիկը» զրկվեց չեմպիոնությունից։ Աղմկոտ վերջաբան ունեցավ նաև Հայաստանի նախորդ տարվա առաջնությունը։ Հատկապես մտահոգիչ է, որ իրավիճակը շտկելու ուղղությամբ շոշափելի քայլեր չեն արվում։
Այո, ակումբները զարգանում են, բարձրանում է խաղի որակը, ինչի արդյունքում մրցակցությունը լարված է։ Այս իրավիճակում նորմալ մրցավարություն ունենալն ուղղակի անհրաժեշտություն է։ Եթե ամեն տարի վերջնական արդյունքները կասկածի տակ դրվեն, մոտ ապագայում ակումբները և ակումբների հովանավորներն ուղղակի անիմաստ կհամարեն ներդրումներ կատարել և պայքարել բարձր արդյունքների համար։
