Վերջին օրերին սոցիալական ցանցերում լայն քննարկման թեմա է դարձել «Զովք» սուպերմարկետներից մեկում հուլիսի 13-ին տեղի ունեցած միջադեպը։ Հաճախորդը մոտ 2000 դրամի գնում է կատարել և վճարել 10 000 դրամանոց թղթադրամով։ Փորձաշրջան անցնող գանձապահը հաշվարկային սխալի հետևանքով նրան վերադարձրել է 20 000 դրամից հաշվարկված մանրադրամ՝ նախատեսվածից 10 000 դրամով ավելի։
«Զովք»-ը չի հերքում աշխատակցի թույլ տված սխալը և ընդունում է իր պատասխանատվությունը։ Սխալը պարզելուց հետո մասնաճյուղի մենեջերը կապ է հաստատել հաճախորդի հետ, ներողություն խնդրել, ներկայացրել կատարվածը և առաջարկել այցելել մասնաճյուղ՝ անձամբ ծանոթանալու տեսագրություններին։
Հաճախորդը սոցիալական ցանցերում հայտնել է, որ գումարի տարբերությունը վերադարձնելու պահանջը ներկայացվել է պարտադրական և ոչ պատշաճ տոնով։ Նա նաև պնդել է, թե իրեն մեղադրել են գողության մեջ։ Ընկերությունը, սակայն, հրապարակված ձայնագրությունների և տեսագրությունների հիման վրա հերքում է այդ պնդումը՝ ընդգծելով, որ հաճախորդին գողության մեջ որևէ մեկը չի մեղադրել։
Անվտանգության աշխատակցի հետ զրույցում նույնպես հստակ նշվել է, որ սխալմամբ վերադարձված գումարի տարբերությունը հետ բերելը հաճախորդի ցանկությունն է և բարի կամքի դրսևորում, այլ ոչ պարտադրանք։ Ընկերության ներկայացուցիչները փորձել են հարցը լուծել անմիջական շփման, փոխադարձ հարգանքի և փաստերին ծանոթանալու միջոցով։
Այնուամենայնիվ, միջադեպի մասին տեղեկությունն ի սկզբանե տարածվել է միայն մեկ կողմի մեկնաբանությամբ՝ առանց «Զովք»-ի դիրքորոշման և առկա փաստական նյութերի։ Արդյունքում սովորական հաշվարկային սխալը ներկայացվել է որպես հաճախորդի նկատմամբ ճնշման և գողության մեղադրանքի պատմություն։ Նույնիսկ ընկերության պարզաբանումից և միջադեպի իրական ընթացքը ցույց տվող նյութերի հրապարակումից հետո շարունակվել են նույն միակողմանի շեշտադրումներով հրապարակումները։
«Զովք»-ը շեշտում է՝ չի խուսափում իր աշխատակցի թույլ տված սխալի պատասխանատվությունից, սակայն ակնկալում է, որ նման դեպքերը գնահատվեն ամբողջական փաստերի հիման վրա՝ առանց չհաստատված պնդումների և ընկերության հեղինակությանը վնաս հասցնող միակողմանի հրապարակումների։
Միևնույն ժամանակ, այժմ, երբ երկու կողմերն էլ ներկայացրել են իրենց դիրքորոշումները, իսկ սխալմամբ ավել տրամադրված գումարը վերադարձվել է, հանրության, հաճախորդների և սուպերմարկետի շահերից է բխում, որ միջադեպի շուրջ քննարկումը համարվի ավարտված։ Հարցի հետագա շարունակությունն այլևս նոր փաստ չի ավելացնի և միայն կերկարաձգի արդեն իսկ պարզաբանված ու կարգավորված իրավիճակի շուրջ ստեղծված աղմուկը։ Նման դեպքերում հատկապես կարևոր է, որ հրապարակային խոսքը չդառնա սոցիալական ցանցերում դիտումների և արձագանքների ավելացման միջոց՝ տարիների ընթացքում ձևավորված գործարար համբավի հաշվին։
