Իսպանիայի Սարագոսայի նահանգի Սինկո Վիլաս շրջանում անտառային հրդեհն այրել է 12 000 հեկտար տարածք և ստիպել վեց գյուղից տարհանել բնակիչներին: Աս մասին հաղորդում է Euronews-ը։
Մայրաքաղաք Մադրիդը և Գվադալախարա քաղաքը ևս պայքարում են հրդեհների դեմ, որոնց պատճառով ավելի քան 2000 մարդ է տարհանվել, իսկ Սիուդադ Ռեալում հրդեհը մարվել է 800 հեկտար տարածք այրելուց հետո։
Իսպանիայի ամենալուրջ հրդեհը Սարագոսա նահանգի Սինկո Վիլաս շրջանում է, որը դարձել է տարվա ամենամեծ հրդեհը երկրում։
Ըստ իշխանությունների՝ հուլիսի 15-ին սկսված հրդեհը շարունակում է մնալ «բավականին ակտիվ» և զգալիորեն տարածվել է հուլիսի 16-ի գիշերը և հուլիսի 17-ի վաղ առավոտյան։ Հրդեհի պարագիծն արդեն հասել է 60 կիլոմետրի։ Ընդհանուր առմամբ, տուժել է ավելի քան 1100 մարդ։
Քաղաքացիական գվարդիան հրկիզման կասկածանքով հուլիսի 16-ին ձերբակալել է մի տղամարդու։ Մի քանի բնակիչ ահազանգել են իշխանություններին՝ տեսնելով, որ մի մարդ կասկածելի հանգամանքներում փախչում է տարածքից։
Ձերբակալման պահին կասկածյալը կրում էր ուսապարկ, որը լի է եղել տարբեր իրերով, այդ թվում՝ բազմաթիվ դյուրավառ իրերով։ Նրան նույնականացնելուց հետո ոստիկանները պարզել են, որ նա նմանատիպ հանցագործություններ է կատարել Իսպանիայի այլ նահանգներում ևս։
