Երրորդ տարին անընդմեջ Գերմանիան ամենավերջին տեղում է Եվրոպայում բնակչության աճով: Այս մասին հաղորդում է Die Welt-ը՝ հղում կատարելով եվրոպական վիճակագրական ծառայության (Eurostat) հրապարակած զեկույցին: 2010 թ. ամեն հազար գերմանացուն բաժին է ընկել 8.3 նորածին:
Գերմանիան շատ ցածր է միջին եվրոպական վիճակագրական տվյալներից, որտեղ 1000 հոգուն բաժին է ընկնում 10.7 նորածին: Ամենաբարձր ծնելիությունն Իռլանդիայում է՝ 16.5 նորածին ամեն 1000 բնակչին, մեծ Բրիտանիայում՝ 13 նորածին և Ֆրանսիայում՝ 12.8 նորածին: 2011 թ. սկզբին Եվրամիությունում ապրել է 502.5 միլիոն մարդ՝ 1.4-ով ավելի, քան մեկ տարի առաջ:
Նշվում է, որ բնակչության աճը հիմնականում պայմանավորված է ներգաղթյալների քանակի ավելացմամբ: Eurostat-ի կանխատեսմամբ՝ 2060 թ-ին Գերմանիայի բնակչությունը կկրճատվի 16 միլիոնով՝ զիջելով առաջատարությունը Մեծ Բրիտանիային և Ֆրանսիային:
