«Որևէ ենթատեքստ պետք չէ գտնել։ Հիմա նոր թեկնածու ունենք, խմբակցությունը որևէ քննարկում դեռևս չի հասցրել ունենալ։ Հուսամ՝ ինչպես նախորդ դեպքում, այս թեկնածուի հետ էլ կհանդիպենք։ Սպասում ենք հանդիպմանը»,-«Առաջին լրատվական»-ի հետ զրույցում ասաց ԱԺ «Իմ քայլը» խմբակցության քարտուղար Հակոբ Սիմիդյանը՝ անդրադառնալով ՍԴ դատավորի նոր թեկնածուի առաջադրմանը։ Երեկ նախագահ Արմեն Սարգսյանը ՍԴ դատավորի թեկնածու է առաջադրել Արթուր Վաղարշյանին։
ՀՔԾ-ն մերժել է ԲՀԿ նախագահ Գագիկ Ծառուկյանին մանդատից զրկելու գործով քրեական գործ հարուցելու դիմումը հանցակազմի բացակայության պատճառով։ Սիմիդյանի դիտարկմամբ՝ նոր Հայաստանում հարցերը շատ են և հարցերը ենթադրում են պատասխաններ․«Այն, ինչ կարող ենք անել՝ էթիկայի հանձնաժողովի ստեղծում և այլն, բայց շատ լավ կլիներ, որ, օրինակ, նման նախաձեռնություն լիներ ԲՀԿ խմբակցության կողմից։ Ես կարծում եմ, որ նոր Հայաստանում նրանց կողմից նման քայլը շատ դրական ազդեցություն կունենար այն իմաստով, որ կհանդիսանար ապացույց, որ նրանք էլլ են կողմնակից, որ նոր Հայաստանում պատգամավորը ձեռներեցությամբ չպետք է զբաղվի»,-ասաց պատգամավորը։
Նա նշեց, որ ակնկալում է՝ ԲՀԿ-ն ինքը կնախաձեռնի նման հանձնաժողովի ստեղծումը, ինչը շատ լավ ուղերձ կլինի հանրությանը։