Անգլիայի Պրեմիեր լիգայի 25-րդ տուրում այսօր Լոնդոնի «Արսենալը» կհյուրընկալվի «Մանչեսթեր Սիթիին»: Սպասվում է, որ այս հանդիպմանը կմասնակցի նաև Հայաստանի ազգային հավաքականի կիսապաշտպան Հենրիխ Մխիթարյանը: Վերջինս ծանր վնասվածք էր ստացել նախորդ տարվա դեկտեմբերին տեղի ունեցած «Տոտենհեմի» հետ գավաթային հանդիպման ժամանակ: Արդեն ամանորյա տոներից հետո բրիտանական ԶԼՄ-ները հույս էին հայտնել, որ Մխիթարյանը շարք կվերադառնա հենց «Մանչեսթեր Սիթիի» հետ հանդիպման ժամանակ:
Նշենք, որ Մխիթարյանը լիովին ապաքինվել է վնասվածքից և վերջին օրերին մարզվում է թիմի հիմնական խմբում, առանց սահմանափակումների: Ինչ-խոսք հավանականությունը փոքր է, որ Մխիթարյանին վաղը կտեսնենք «Արսենալի» հիմնական կազմում: Տևական ժամանակ չխաղալու հետևանքով մեր ֆուտբոլիստը բնականաբար ֆունկցիոնալ պատրաստվածության հետ կապված խնդիր կունենա:
Այնուամենայնիվ, հնարավոր է, որ «Արսենալի» գլխավոր մարզիչ Ունայ Էմերին Մխիթարյանին խաղալու հնարավորություն տա երկրորդ կեսում: «Արսենալի» երկրպագուները առաջիկա մրցավեճում սպասում են նաև օրեր առաջ «Բարսելոնայից» տեղափոխված 25-ամյա կիսապաշտպան Դենիս Սուարեսի նորամուտին: Երեկ տեղի ունեցած մամուլի ասուլիսի ժամանակ Էմերին չի բացառել, որ Սուարեսը կմասնակցի «Մանչեսթեր Սիթիի» դեմ մրցավեճին: Որոշ վերլուծաբաններ Սուարեսին համարում են հիմնական կազմի համար պայքարում լուրջ մրցակից Մխիթարյանի համար:
Խոսվում է նաև, որ այսօրվա մրցավեճում Էմերին Մխիթարյանի փոխարեն հնարավորություն կտա հենց Սուարեսին, որի հետ մեծ հույսեր է կապում: Բրիտանական վերլուծաբանների մեծ մասը կարծում է, որ «Արսենալը» վաղը կխաղա 5-3-2 մարտավարությամբ և խաղը կսկսի հետևյալ կազմով: Դարպասում կլինի Լենոն, իսկ պաշտպանության կենտրոնում Կոսելնին, Մոնրեալն ու Մուստաֆին: Ձախ եզրում կխաղա Կոլշինացը, իսկ աջից՝ Մայթլենդ-Նայլսը: Կիսապաշտպանության կենտրոնում կգործեն Ջական, Գենդուզին և Տորեյրան: Հարձակման գծում էլ կխաղան Օբամեյանգն ու Լակազետը: Մխիթարյանն ու Սուարեսը կլինեն պահեստայինների շարքում:
24-րդ տուրից հետո «Արսենալը» 47 միավորով 4-րդ հորիզոնականում է գտնվում, իսկ «Մանչեսթեր Սիթին» 56 միավորով՝ 2-րդն է: Մրցաշարային աղյուսակը շարունակում է գլխավորել «Լիվերպուլը», որն ունի 61 միավոր: Նշենք, որ 47 միավոր ունի նաև 5-րդ տեղում գտնվող «Չելսին», իսկ 6-րդ տեղում գտնվող «Մանչեսթեր Յունայթեդը» վաստակել է 45 միավոր:
«Մանչսթեր Սիթի»-«Արսենալ» հանդիպումը կսկսվի Երևանի ժամանակով 20:30-ին: