«Գրադարանները երկար տարիներ բավականին անտեսված են եղել: Ականատես ենք լինում համայնքային գրադարանների փակմանը, ինչը ցավալի իրողություն է: Դա պայմանավորված է 90-ականներին տեղի ունեցած օրենսդրական փոփոխություններով՝ ապակենտրոնացման քաղաքականությամբ, որի հետևանքով համայնքային գրադարաններն անցան համայնքի ենթակայության տակ և կտրվեցին պետությունից: Մշակույթի նախարարությունը փորձում է այս կապը վերականգնել՝ մեղմացնող տարբեր ծրագրերով»,- «Առաջին լրատվական»- ի հետ զրույցում այս մասին ասաց Մշակույթի փոխնախարար, գրահրատարակչության և տեղեկատվական ոլորտի համակարգող Վահե Բուդումյանը:
Նա նաև ընդգծեց, որ գրադարանները նոր գրքային ֆոնդով համալրվելու խնդիր ունեն: Բուդումյանի խոսքով՝ գրադարաններին հատկացվել է չնչին գումար, որով ընդամենը մի քանի տասնյակ գիրք է հնարավոր ձեռք բերել, իսկ դա չի կարող բավարարել ընթերցողների պահանջը: «Մշակույթի նախարարությունն այդ ուղղությամբ աշխատանքներ է իրականացնում՝ համալրման բյուջեն կրկնապատկվել է, և մարզային գրադարանները կստանան կրկնակի քանակությամբ գրքեր»,- նշեց փոխնախարարը:
Մանրամասն՝ տեսանյութում: