ԱՄՆ-ում Starbucks ցանցը մայիսի 29-ին կփակի իր 8 հազար սրճարանները, որպեսզի անձնակազմին հրահանգավորի ռասսայական նախապաշարմունքների անթույլատրելիության մասին, հաղորդում է The New York Times-ը։
Որոշումը կայացվել է Ֆիլադելֆիայում Starbucks-ի սրճարաններից մեկում տեղի ունեցած միջադեպից հետո։ Երկու աֆրոամերիկացի սրճարան են մտել և ցանկացել են զուգարանից օգտվել։ Սակայն աշխատակիցները նրանց թույլ չեն տվել՝ ասելով, որ ոչինչ չեն պատվիրել։ Երբ վերջինները նստել են սեղաններից մեկի մոտ, սրճարանի աշխատակիցները նրանց խնդրել են հեռանալ, իսկ հետո ոստիկանություն են կանչել։
Արդյունքում ոստիկանները տղամարդկանց ոստիկանական տեղամաս են տարել, սակայն ոչ մի մեղադրանք չեն առաջադրել։
Պարբերականը նշում է, որ դրանից հետո Starbucks-ը բոյկոտելու կոչեր են սկսվել։
Ընկերության ղեկավար Քևին Ջոնսոնի խոսքով՝ ինքը փորձում է հասկանալ, թե որտեղ է սխալվել ղեկավարությունը, և ինչպես կարելի է ուղղել այդ սխալը։
Մայիսի 29-ին ԱՄՆ-ում կփակվեն Starbucks-ի բոլոր սրճարաններն ու գրասենյակները։ Հրահանգավորման կգնան 175 հազար աշխատակիցներ։ Այն պարտադիր կդառնա նաև ընկերության ապագա աշխատակիցների համար։