Ֆուտբոլի աշխարհի առաջնության ընտրական փուլի ավարտվելուն պես վերջնական տեսք են ստացել Ազգերի լիգայի խաղարկության դիվիզիոնները:
Հայաստանի ազգային թիմը սպասվածին համաձայն ընդգրկված է ամենաթույլ՝ D դիվիզիոնում Մակեդոնիայի, Ադրբեջանի, Վրաստանի, Բելառուսի, Ֆարերյան կղզիների, Լատվիայի, Լյուքսեմբուրգի, Ղազախստանի, Մոլդովայի, Մալթայի, Կոսովոյի, Անդորրայի, Սան-Մարինոյի և Ջիբրալթարի հավաքականների հետ միասին:
Այս հավաքականները բաժանվելու են 4 ենթախմբերի, որում առաջին հորիզոնականները զբաղեցրած թիմերը դուրս են գալու կիսաեզրափակիչ՝ փլեյ-օֆ:
Ու թեև ՈւԵՖԱ-ի որոշմամբ Հայաստանի ու Ադրբեջանի հավաքականները միևնույն խմբում չեն ընդգրկվի, այդուամենայնիվ կա հավանականություն որ հարևան երկրները այդուհանդերձ կհանդիպեն կանաչ դաշտում:
Ենթախմբում հաղթող ճանաչվելու դեպքում հնարավոր է, որ Ադրբեջանի հետ մրցենք կիսաեզրափակչում: Մեր երկրում ֆուտբոլային շատ մասնագետներ անհամբերությամբ են սպասում, որ Հայաստանի հավաքականը Ազգերի լիգայի խաղարկության միջոցով կհայտնվի 2020 թվականի Եվրոպայի առաջնության եզրափակիչ փուլում:
Եվ ահա չի կարելի բացառել, որ D դիվիզիոնում Եվրոպայի առաջնության եզրափակիչ փուլի ուղեգիր կվիճարկեն հենց Հայաստանն ու Ադրբեջանը:
