Երեկ հայտնի դարձավ ֆուտբոլի Հայաստանի ազգային հավաքականի վերջնական կազմը, որը նախապատրաստվելու է հոկտեմբերի 5-ին Երևանում կայանալիք աշխարհի առաջնության ընտրական փուլի Լեհաստանի և մարտի 8-ին Աստանայում կայանալիք Ղազախստանի հավաքականի հետ հանդիպմանը: Չնայած Լեհաստանի հետ հանդիպման ելքը 99 տոկոսով պարզ է, այդուհանդերձ՝ տվյալ մրցավեճին մեր հավաքականը լուրջ խնդիրներ կունենա պաշտպանությունում: Որակազրկման պատճառով երևանյան խաղը բաց կթողնեն կենտրոնական պաշտպաններ Գաել Անդոնյանն ու Վարազդատ Հարոյանը, և մեծ է հավանականությունը, որ կգրանցվի հերթական «փառահեղ» արդյունքը:
Պատրաստ լինելով հերթական ձախողմանը՝ փորձենք հասկանալ, թե ինչ դրական կողմ կարող էին ունենալ առաջիկա հանդիպումները: Քանի որ հոգեվարքի մեջ գտնվող հավաքականն ու հայկական ֆուտբոլը առկա իրավիճակում չեն կարող որևէ հեռանկար ունենալ, միակ դրական երևույթը կարող էր դառնալ ֆուտբոլիստներին խաղալու և դրսևորվելու հնարավորություն տալը: Խոսքը հատկապես վերաբերում է այն ֆուտբոլիստներին, ովքեր իրենց թիմերում խաղաժամանակ չեն ստանում:
Վերջերս «Բեշիկթաշի» հիմնական թիմից երկրորդ թիմ տեղափոխվեց Հայաստանի ազգային հավաքականի կիսապաշտպան Արաս Օզբիլիսը: Սա հերթական հոգեբանական հարվածն էր հայ ֆուտբոլիստին, ում ոչ մի կերպ չի հաջողվում այլ ակումբ տեղափոխվել և խաղային պրակտիկա ձեռք բերել: Օզբիլիսի միակ հույսը Հայաստանի ազգային հավաքականն էր, սակայն Պետրոսյանի ցուցակում մեր երբեմնի առաջատարըներից մեկը տեղ չի գտել: Ու նրա կարիերայի ծանր օրերին Արասին օգնության ձեռք մեկնելու փոխարեն՝ ըստ էության երես ենք թեքում նրանից: Կարծում ենք՝ առկա իրավիճակում Արասը երջանիկ կլիներ, ասենք, Ղազախստանի դեմ 25 րոպե խաղալով: Դա Արթուր Պետրոսյանի կողմից մարդկային քայլ կլիներ, և ոչ ոք նրան չէր քննադատի նման որոշման համար:
Այս տարվա մարտին Երևանում կայացած Ղազախստանի հավաքականի հետ հանդիպումից առաջ Օզբիլիսը ևս խաղային պրակտիկա չուներ: Այդուհանդերձ, փոխարինման դուրս գալով 70-րդ րոպեին՝ ընդամենը 5 րոպե անց դարձավ գեղեցիկ գոլի հեղինակ՝ հաշիվը դարձնելով 2:0: Օզբիլիսը մեծ ավանդ ունի Հայաստանի ազգային հավաքականում, և տեղի ունեցածը, մեղմ ասած, տգեղ երևույթ է: Նշենք, որ խաղային պրակտիկա չունենալով՝ Օզբիլիսը կարող է շատ ավելի հաջող խաղալ հավաքական հրավիրված մյուս կիսապաշտպաններից՝ բացառությամբ Հենրիխ Մխիթարյանի:
Եթե Յուրա Մովսիսյանի՝ ազգային հավաքականում չլինելու պատճառը բոլորին է հայտնի, ապա Օզբիլիսին անտեսելը շատերի համար անսպասելի էր:
Նշենք, որ տևական ժամանակ խաղային պրակտիկայից զրկված է նաև Մարսելի «Օլիմպիկի» ներկայացուցիչ Անդոնյանը: Վերջինս, սակայն, հրավիրվել է առաջիկա հանդիպումներին և հնարավոր է նաև մասնակցի Ղազախստանի հետ հանդիպմանը:
Հայաստանի ազգային թիմում կարծես ավանդույթ է դառնում լավագույն տղերքին անտեսելը: Ինչևէ, կրկին անգամ հավաքական է հրավիրվել ուկրաինական «Ստալի» կիսապաշտպան Էդգար Մալաքյանը, որը մշտապես հավաքական է ժամանում տուրիստի կարգավիճակով: Դժվար է նույնիսկ հիշել, թե Մալաքյանը վերջին անգամ երբ է փոխարինման դուրս եկալ ազգային թիմի կազմում: Թե ինչու է Մալաքյանը կրկին հրավիրվել ազգային հավաքական՝ դժվար է ասել: Այս հարցին կարող է պատասխանել միայն Պետրոսյանը:
Նշենք, որ Մալաքյանին հրավիրելուն ու չխաղացնելուն անդրադարձել էին նաև ուկրաինական լրատվամիջոցները՝ Արթուր Պետրոսյանի որոշումը որակելով պարադոքսալ:
Հայտնվելով ծանր իրավիճակում՝ մեր հավաքականի գյումրեցի մարզիչը վերջապես հավաքական է հրավիրել ֆուտբոլիստներ Գյումրիի «Շիրակից»: Առաջիկա հանդիպումներին ազգային հավաքականում կնախապատրաստվեն Ռոբերտ Դարբինյանն ու Արտյոմ Միքայելյանը: Հիշեցնենք, որ «Շիրակի» ֆուտբոլիստները, բացառությամբ դարպասապահ Անատոլի Այվազովի, Պետրոսյանի կողմից տևական ժամանակ անտեսված էին: Առաջիկա հանդիպումներին Լևոն Հայրապետյանը, Հրայր Մկոյանը և Արթուր Սարկիսովը չեն մասնակցի վնասվածքի պատճառով:
