Վերջին տարիներին Հայաստանում բազմաթիվ քննարկումներ են եղել, թե որոնք են ամենատարածված մարզաձևերը հանրապետությունում: Այդ հարցում պատկերը զգալիորեն հստակեցնում է Google-ի որոնողական համակարգը, որը թույլ է տալիս պատկերացում կազմել, թե Հայաստանում որ մարզաձևերի նկատմամբ է ամենամեծ հետաքրքրությունն ազգաբնակչության կողմից: Google.am-ի որոնողական համակարգը տալիս է նման տվյալներ մարզաձևերի հիշատակումների վերաբերյալ.
1. Ֆուտբոլ – 2.100.000 հիշատակում
2. Շախմատ – 1.380.000
3. Բասկետբոլ – 419.000
4. Թենիս (մեծ և սեղանի) – 389.000
5. Բռնցքամարտ – 316.000
6. Ըմբշամարտ – 232.000
7. Լող – 214.000
8. Հոկեյ (տափօղակով և խոտի միասին) – 188.000
9. Ծանրամարտ- 185.000
10. Գեղասահք- 128.000
Մյուս մարզաձևերը հիշատակվել են 100 հազարից քիչ: Որոնողական համակարգի թվերը ցույց են տալիս, որ Հայաստանում ֆուտբոլի նկատմամբ հետաքրքրությունը զգալիորեն մեծ է, քան մյուս մարզաձևերի նկատմամբ: Երկրորդ տեղում է շախմատը, որն, իհարկե, որոշ վերապահումներով կարելի է մարզաձև համարել, քանի որ այն ավելի շատ ինտելեկտուալ խաղ է: Լավագույն եռյակում է բասկետբոլը, որի նկատմամբ հետաքրքրությունը կտրուկ աճել է վերջին 2-3 տարիներին:
Եվ ընդհանրապես վիճակագրական այս տվյալները ցույց են տալիս, որ Հայաստանում հասարակության կողմից մեծ է հետաքրքրությունը թիմային մարզաձևերի նկատմամբ: Մատների վրա կարելի է հաշվել, թե տարվա կտրվածքով քանի անգամ մարզասերը կարող է ներկա գտնվել թիմային ուշագրավ հանդիպման՝ երկրպագելով իր սիրելի ակումբին: Թերևս ֆուտբոլի ազգային թիմն է, որ Երևանում անցկացնելով 5-8 հանդիպում՝ մարզադաշտ է բերում միջինը 10 հազար մարզասերների:
Վերջին տասը տարիների ընթացքում թիմային սպորտաձևերից հասարակության շրջանում ուշադրության են արժանացել բասկետբոլային «Հատիս» և «Ուրարտու» ակումբներն ու հոկեյի ազգային հավաքականը, որը Մարզահամերգային համալիրում մասնակցեց ընտրական մրցաշարի: Հավանաբար սա է պատճառը, որ լավագույն տասնյակում տեղ են գտնել նաև բասկետբոլն ու հոկեյը: Եթե հոկեյը Հայաստանում երբեք մասսայականություն չի վայելել, ապա բասկետբոլը կարելի է համարել հեռանկար ունեցող սպորտաձև, ինչի ապացույցը ազգային և տարբեր տարիքային հավաքականների բավական հաջող ելույթներն են միջազգային ասպարեզում: Լուրջ ներդրումների և ուշադրության դեպքում բասկետբոլը կարող է ավելի պատկառելի հաջողություններ ունենալ Հայաստանում:
Ինչ վերաբերում է բռնցքամարտին, ըմբշամարտին և ծանրամարտին, ապա այս մարզաձևերը մեր երկրում միշտ եղել են առաջատար դիրքերում, և միջազգային ասպարեզում մեդալներ ունեցել ենք հիմնականում հենց թվարկված սպորտաձևերի ներկայացուցիչների շնորհիվ: Վառ ապացույցը նախորդ տարվա օլիմպիական խաղերն էին, որում մեր մարզիչկները երկուական մեդալ նվաճեցին ըմբշամարտում և ծանրամարտում:
