Աստղագետ Արեգ Միքայելյանը, այսօր հրավիրված ասուլիսի ընթացքում անդրադառնալով աշխարհի վերջի մասին վարկածներին, կարծում է, որ միտքն արդեն չափից շատ է չարաշահվում:
Հիշեցնելով, որ Նոստրադամուսի, Վանգայի և այլ պայծառատեսների կանխատեսած աշխարհի վերջը մենք արդեն վերապրել ենք՝ աստղագետը հույս է հայտնում,որ կվերապրենք նաև 2012 թվականի դեկտեմբերի 21-ը, որը Մայաների օրացույցում նշվում է որպես աշխարհի վերջ:
«Ճիշտ է, 2012 թվականին ջերմաստիճանի բարձրացում սպասվում է, սակայն դա չի կարող բերել աշխարհի կործանման»,- կարծում է աստղագետը: Ըստ նրա՝ Արեգակը կշարունակի նույն ակտիվությամբ գոյություն ունենալ ևս 5 միլիարդ տարի: «Ավելի վտանգավոր է տեխնոլոգիական կործանումը, այսինքն՝ մարդկության կործանումը ավելի հավանական է դառնում գիտության զարգացման և տեխնոլոգիական նոր զենքերի ստեղծման հետ կապված»:
Աստղագետը նաև հարկ է համարում նշել, որ աշխարհի վերջի մոտենալու վարկածով անհանգստացած են զարգացած երկրներում, որտեղ չկան առօրյա սոցիալական խնդիրներ, և մարդիկ պարզապես զբաղմունք են գտնում դրա մեջ: