Հոլանդիայի Ուտրեխտ քաղաքի «Հալդենվարդ» ստադիոնում հուլիսի 14-ին տեղի կունենա Եվրոպայի պատանեկան ամառային օլիմպիական 12-րդ փառատոնի բացման հանդիսավոր արարողությունը:
Ծրագրում ընդգրկված է 9 մարզաձև: Նախատեսվում է եվրոպական 49 երկրների շուրջ 3300 մարզիկ-մարզուհիների մասնակցությունը: Նրանց թվում կլինեն Հայաստանի ներկայացուցիչները՝ թենիսիստներ Միլենա Ավետիսյանը, Լինդա Օհանյանը, Դավիթ Մուրադյանը, Հրաչ Խաչատրյանը, խճուղային հեծանվորդներ՝ Աբել Մանուկյանը, Էդգար Ստեփանյանը, Պավել Ստեփանյանը, աթլետներ՝ Ռաֆայել Պետրոսյանը, Վարդան Նիկոլայանը, Մարիաննա Բաղյանը, Իրինա Պողոսյանը, լողորդներ՝ Անի Պողոսյանը, Վանիկ Բարսեղյանը, սպորտային մարմնամարզիկներ՝ Արսեն Գևորգյանը, Վիգեն Խաչատրյանը, Հայկ Պետրոսյան և ձյուդոիստներ Ալբերտ Մկրտչյանը, Ռոբերտ Գաբրիելյանը, Գրիգոր Սահակյանը, Ավետիք Գրիգորյանը, Շահեն Աբաղյանը, Էդվարդ Գրիգորյանը: Նրանց մրցասպարեզ կուղեկցեն համապատասխան մարզաձևերի վեց մարզիչներ:
Մեր երկիրը մասնակիցներ չի ունենա խաղային մարզաձևերում՝ բասկետբոլ, վոլեյբոլ, հանդբոլ: Բանն այն է , որ նշած մարզաձևերի եվրոպական ֆեդերացիաները մասնակցության իրավունք են տալիս միայն բարձր վարկանիշ ունեցող տղաների և աղջիկների ութական թիմերի: Ուտրեխտյան փառատոնը կավարտվի հուլիսի 20-ին: Այդ մասին տեղեկացնում է ՀԱՕԿ մամլո ծառայությունը:
