Ռուսաստանը Ղազախստանի Բայկոնուր տիեզերակայանից «Soyuz MS-29» տիեզերանավով Միջազգային տիեզերական կայան է ուղարկել երկու ռուս տիեզերագնացների և NASA-ի մեկ ամերիկացի աստղագնացի։ Թռիչքը նշանավորվել է նաև նրանով, որ վերջին տարիներին առաջին անգամ արձակմանը միասին ներկա էին NASA-ի և ՌԴ «Ռոսկոսմոս» պետական կորպորացիայի ղեկավարները։
NASA -ի տիեզերագնաց Անիլ Մենոնը և ռուս տիեզերագնացներ Պյոտր Դուբրովն ու Աննա Կիկինան Բայկոնուրից մեկնարկել են ԱՄՆ արևելյան ժամանակով ժամը 10:47-ին (Գրինվիչի ժամանակով՝ 14:47-ին)։ Տիեզերանավը Միջազգային տիեզերական կայանին է միացել արձակումից մոտ երեք ժամ անց՝ Միջերկրական ծովի վրայով թռիչքի ընթացքում։ Նոր անձնակազմը կայանում կմնա շուրջ ութ ամիս՝ որպես «Expedition 75» առաքելության մասնակից։
Արձակմանը հետևելու համար Բայկոնուր էր ժամանել նաև NASA -ի ղեկավար Ջարեդ Այզեկմանը, որը հանդիպել է «Ռոսկոսմոսի» ղեկավար Դմիտրի Բականովին։ Սա NASA -ի ղեկավարի առաջին այցն էր ռուսական տիեզերակայան 2018 թվականից հետո։ Ռուս-ուկրաինական պատերազմի հետևանքով ստեղծված լարվածության պատճառով նախկինում NASA -ի ղեկավար Բիլ Նելսոնը չէր այցելել Ռուսաստան։
