Համաշխարհային բանկը Հայաստանին 40 միլիոն դոլարի փոխառություն է տրամադրել էներգամատակարարման հուսալիության համար: Դժվար է ասել, թե ինչքանով է այս որոշումը պայմանավորված Հայաստանում էլեկտրաէներգիայի թանկացման մասին Հայաստանի իշխանությունների որոշումով, որն էլ իշխանությունները հիմնավորում են նրանով, որ էներգամատակարարումը հարվածի տակ կընկնի, եթե հոսանքը չթանկանա:
Համաշխարհային բանկը 40 միլիոն դոլարը տրամադրում է որպես արդեն ընթացքի մեջ գտնվող ծրագրի հավելյալ ֆինանսավորում: Այսինքն, ըստ էության, ստացվում է, որ բացի նրանից, որ Հայաստանի հասարակությունն է պարտադրված վճարելու էներգամատակարարման համակարգի ճգնաժամի համար, Հայաստանը դրանից իբրև խուսափելու համար նաև Համաշխարհային բանկի միլիոններից է օգտվում:
Եվ այստեղ հարց է առաջանում՝ իսկ գիտե՞ Համաշխարհային բանկը, թե ինչ վիճակ է հայկական էներգետիկայում և այդ վիճակից ելնելու ինչ քայլեր է ձեռնարկում Հայաստանի իշխանական համակարգը: Եվ այս քայլերի համատեքստում 40 միլիոն դոլարը, ըստ էության, շատ ուշագրավ ենթատեքստ է ստանում, և այնպիսի տպավորություն է ստեղծվում, որ Համաշխարհային բանկը 40 միլիոն դոլարով խրախուսում է էլեկտրաէներգիան թանկացնելու մասին Հայաստանի իշխանությունների որոշումը:
Համենայնդեպս, էներգամատակարարման կայունության ծրագրի ֆինանսավորումը ներկայումս առավել քան զավեշտալի է հնչում, երբ իշխանությունները հայտարարում են, որ կայունությունն ապահովելու համար պետք է էլեկտրաէներգիան թանկանա: Այդ դեպքում ի՞նչ պետք է լինի 40 միլիոն դոլարը, և արդյո՞ք այստեղ էներգամատակարարման կայունության ծրագիրը ընդամենը փող տալու ֆորմալ պատճառ չէ, և իրականում այդ 40 միլիոնը Հայաստանի իշխանություններին բոլորովին այլ բանի համար է պետք, իսկ ավելի կոնկրետ՝ բյուջետային ծախսերի, մասնավորապես թոշակների ու աշխատավարձերի մասով:
Միգուցե Համաշխարհային բանկը Հայաստանին շատ ավելի օգնած կլինի, եթե ըստ էության Դանայան տակառի վերածված Հայաստանի էներգետիկ համակարգը լցնելու փոխարեն, օգնի Հայաստանի հասարակությանը հասկանալ, թե ինչ է կատարվում այդ համակարգում, և ինչու է այն հասել անկայունության ու ճգնաժամի սպառնալիքների, որոնք հրապարակում են Հայաստանի իշխանությունները էլեկտրաէներգիայի թանկացումը հիմնավորելու համար:
Լուսանկարը` PanARMENIAN Photo-ի
