Կատալոնական «Բարսելոնա»-ն նոր գլխավոր մարզչի՝ Տիտո Վիլանովայի գլխավորությամբ Իսպանիայի Լա Լիգայի ընթացիկ մրցաշրջանում մեկնարկել է 4 հաղթանակներով: Ըստ վիճակագրական տվյալների՝ կատալոնական ակումբը նման մեկնարկ ունեցել է 4 անգամ՝ վերջին 22 տարիներին:
Եթե կատալոնացիները շարունակեն նման կերպ խաղալ, ապա Վիլանովան կգերազանցի «Բարսելոնա»-ի այնպիսի լեգենդար մարզիչների ցուցանիշներ, ինչպիսիք են Պեպ Գվարդիոլան, Լուի վան Գալն ու Յոհան Կրոյֆը:
1990/91թթ. մրցաշրջանում «Բարսելոնա»-ն Կրոյֆի գլխավորությամբ տոնեց մեկնարկային 6 հաղթանակ: 7 տարի անց նման հաջողության հասավ արդեն մյուս հոլանդացին՝ վան Գալը: Մեկնարկային 6 հաղթանակ տոնել է նաև Գվարդիոլայի թիմը՝ 2009/10թթ. մրցաշրջանում: 3 դեպքերում էլ կատալոնացիները դարձել են Լա Լիգայի չեմպիոն:
Այդ ցուցանիշը գերազանցելը դժվար կլինի Տիտոյի համար, քանի որ եթե թիմը լուրջ խոչընդոտների չհանդիպի «Գրանադա»-ի հետ խաղում, ապա «Սևիլիա»-ի ու «Ռեալ»-ի հետ խաղերում պայքարը թեժ է լինելու:
Այդ ցուցանիշով ռեկորդակիրը իռլանդացի մարզիչ Պատրիկ Օ՛Կոնելն է, ում գլխավորած թիմը 1935/36թթ. մրցաշրջանի մեկնարկից սկսած` 9 անընդմեջ հաղթանակ տոնեց:
