ՀԱՕԿ-ի լրատվական ծառայության տեղեկացմամբ`Լեհաստանի Կատովիցե քաղաքում անցկացված Եվրոպայի հունահռոմեական ըմբշամարտի պատանեկան առաջնությունում վստահ մրցելույթ ունեցավ ՀՀ վաստակավոր մարզիչ Գագիկ Խաչատրյանի գլխավորած Հայաստանի հավաքականը:
ՀՀ սպորտի և երիտասարդության հարցերի նախարարության համակարգում գործող Ջրվեժի ըմբշամարտի մարզադպրոցի սան Վահե Սարգսյանը (42 կգ) և Երևանի մասնագիտացված ՄԴ –ի պատվիրակ Կարեն Ասլանյանը (58 կգ) հաղթեցին իրենց բոլոր մրցակիցներին, գրավեցին առաջին տեղը և կանգնեցին պատվո պատվանդանի ամենավերին աստիճանին:
Նրանց թիմակիցներ Գեղամ Թորգոմյանը (50 կգ) և Արմեն Հակոբյանը (69 կգ) դարձան երկրորդ, իսկ Տարոն Դումոյանը (54 կգ) և Տիգրան Աբրահամյանը (63 կգ)` երրորդ մրցանակակիրներ:
Թիմային հաջողությանը նպաստեցին նաև լավագույն հնգյակը եզրափակած Արթուր Սիմոնյանը (46 կգ ) և Հարություն Միքայելյանը (76 կգ):
Առաջնությունում ընդհանրապես աչքի ընկան հարավկովկասյան երեք հանրապետությունների պատվիրակները, ովքեր թիմային պայքարում լավագույն եռյակը զբաղեցրին հետևյալ հաջորդականությամբ` Վրաստան, Հայաստան, Ադրբեջան:
Հիշեցնենք, որ մինչ այս Կատովիցեում մրցեցին ազատ ոճայինները, և մեր հավաքականի տղաներից Արման Խաչատրյանը գրավեց առաջին, իսկ Մխիթար Գրիգորյանը, Հմայակ Աղաջանյանը և Ռազմիկ Պողոսյանը` երրորդ տեղը :