ՀԱՕԿ-ի լրատվական ծառայությունից տեղեկացնում են, որ Խորվաթիայի մայրաքաղաք Զագրեբում հաջորդաբար անցկացվեցին Եվրոպայի ազատ և հունահռոմեական ըմբշամարտի երիտասարդական առաջնությունները: Իրենց հարաբերությունները որոշեցին 34 երկրների պատվիրակներ (170 ազատ և 185 հունահռոմեական ոճի ըմբիշներ): Հայաստանի մարզիկները աչքի ընկան լավ պատրաստվածությամբ :
Ազատ ըմբշամարտում իր հաշվին չորս հաղթանակ , մեկ պարտություն գրանցեց , երկրորդ տեղը գրավեց և արծաթե մեդալակիր դարձավ արմավիրցի Արտակ Հովհաննիսյանը (55 կգ): Նույն սցենարով անցկացվեցին նաև ախուրյանցի Դավիթ Ափոյանի (66 կգ) մրցելույթները: Նա նույնպես դարձավ արծաթե մեդալակիր ու կանգնեց պատվանդանի երկրորդ աստիճանին:
Վեց անգամ մրցագորգ ելավ և հինգ հաղթանակ տոնեց Վոլոդյա Ֆրանգուլյանը (60 կգ): Բայց Երևանի օլիմպիական պետական մարզական քոլեջի սովորողը շատերի նման նոր մրցակարգի զոհը դարձավ, բավարարվեց ընդամենը երրորդ տեղով ու արժանացավ բրոնզե մեդալի:
Թիմային հաշվարկով մարզիչ Ավետիք Վարդանյանի գլխավորած հավաքականը եզրափակեց լավագույն հնգյակը :
Ուրախացրեց նաև հունահռոմեական ըմբշամարտի մեր երիտասարդական հավաքականը: Ավագ մարզիչ Արմեն Բաբալարյանի սաները վեցերորդը ճանաչվեցին թիմային պայքարում, իսկ վերը նշած քոլեջի սովորող, երևանցի Գևորգ Ղամբարյանը ( 55 կգ ) գետնեց բոլոր մրցակիցներին , գրավեց առաջին տեղը և արժանիորեն կանգնեց չեմպիոնական պատվանդանին : Նրա ևս երկու թիմակիցներ բավարարվեցին հինգերորդ տեղով :
