Իրանի նախագահ Մահմուդ Ահմադինեժադն ուրանի մինչև 20 % հարստացումը համարում է իր երկրի իրավունքը:
Միջազգային կանոնների համաձայն` հարստացումը 20 %-ի մակարդակով մեր իրավունքն է: Խոսքը միջուկային զենք ստեղծելու քայլի մասին չէ»,- France-24 հեռուստաալիքին տված հարցազրույցում ասել է նախագահը:
Հիշեցնենք, որ ավելի վաղ միջազգային գործակալությունների կողմից հրապարակվել էր ԱՄՆ Ազգային անվտանգության ինստիտուտի ներկայացուցիչների գնահատականը, համաձայն որի՝ Իրանը բավականին մեծացրել է ցածր հարստացրած ուրանի շրջանառությունը, և արտադրված վառելիքի ընդհանուր ծավալը հերիք է առնվազն հինգ միջուկային ռումբ ստեղծելու համար:
Այդ եզրակացությանը գիտնականները հանգել են ՄԱԳԱՏԷ-ի կիսամյակային զեկույցից: Հաշվետվությունում նշվում է, որ Իրանն առաջ է շարժվում ուրանի հարստացման աշխատանքներում:
Մասնավորապես, Իրանին հաջողվել է ստեղծել գրեթե 6.2 տոննա ուրան, որը հարստացվել է մինչև 3,5 %: Դա գրեթե 750 կգ ավել է, քան նշված էր նախորդ հաշվետվության մեջ:
