Թուրքիայի նախագահ Էրդողանը հայտարարել է, թե Հայաստանն ու Ադրբեջանը պետք է հնարավորինս շուտ ստորագրեն խաղաղության համաձայնագիրը, որպեսզի ռեգիոնում հաստատվի կայունություն: Նա ակնկալել է, որ Ալմաթիի հանդիպմանը, որ լինելու է արտգործնախարարների մակարդակով, Երեւանն ու Բաքուն կգրանցեն առաջընթաց: Հայաստանի արտգործնախարար Միրզոյանը Հունգարիա այցի ընթացքում հույս էր հայտնել, որ հնարավոր կլինի Ալմաթիում գրանցել առաջընթաց եւ պարտավորությունները ամրագրել գրավոր: Արդյո՞ք նույնն են Անկարայից հնչող առաջընթացի ակնկալիքը, եւ Արարատ Միրզոյանի բարձրաձայնած առաջւթացի ակնկալիքը:
Եթե դրանք նույնն են, ապա թերեւս պետք է ենթադրել, որ խոսքը Բաքվի պայմանները ընդունելու մասին է: Հետեւաբար, պետք է ենթադրել, որ Երեւանի ակնկալած առաջընթացը պետք է լինի ոչ թե դա, այլ հավասարակշռված համաձայնությունների կայացումը: Բայց, կարծես թե գոնե առայժմ Բաքուն որեւէ կերպ չի դրսեւորում հավասարակշռված գործընթացի պատրաստ լինելու, ցանկություն ունենալու նշաններ:
Էրդողանի հայտարարությունը սակայն ավելի շուտ գուցե ուղղված է Ռուսաստանին, ու հատկանշական է, որ հնչում է այն օրը, երբ Մոսկվայում է Հայաստանի վարչապետ Նիկոլ Փաշինյանը՝ ԵՏՄ հովելյանական վեհաժողովը նախագահելու, նաեւ ՌԴ նախագահ Պուտինի հետ հանդիպելու համար: Էրդդողանը գուցե ակնկալում է, որ Պուտի՞նը Հայաստանի վարչապետին մղի ալմաթիում արագ համաձայնության: Բայց, արդյո՞ք Պուտինն ունի դրա շահագրգռությունը, եթե նկատի ունենանք այն, որ ռուս-թուրքական անհամաձայնություններն են կարծես թե բավականին «կայուն», ինչի հետեւանքով Պուտինը հետաձգում է Թուրքիա կատարելիք այցը ամիսներ:
Մոսկվան ԱԳՆ մակարդակով ողջունել է Ալմաթիի հանդիպումը, ի տարբերություն օրինակ ապրիլի 19-ի սահմանային հայտարարության: Մոսկվան, ի դեպ՝ նաեւ Ֆրանսիան առ այսօր ըստ էության չեն անդրադարձել եւ առավել եւս չեն ողջունել այդ հայտարարությունը: Եթե Մոսկվան ողջունում է Ալմաթիի հանդիպումը, ապա պետք է ենթադրել, որ այնտեղ պատկերացնում է այլ տրամաբանություն, քան ապրիլի 19-ի հայտարարությունը: Իսկ ապրիլի 19-ը Թուրքիան ողջունել է առաջիններից մեկը: Հետեւաբար, արդյո՞ք Ռուսաստանն Ալմաթիից ակնկալում է մի բան, Թուրքիան՝ այլ: Իսկապես ինտրիգ է, հատկապես հաշվի առնելով նաեւ Ալմաթիի շեմին Հայաստանի ներքաղաքական ինտրիգը՝ մայիսի 9-ին Երեւան է մտնելու Բագրատ սրբազաննի առաջնորդած շարժումը, իր բավականին հնչեղ եւ թափանցիկ հավակնություններով: Ինչ պատկեր կլինի մայիսի 9-ին Երեւանում, զգալիորեն կպայմանավորի նաեւ «եղանակը» Ալմաթիում:
