Իտալական Gazzetta dello Sport պարբերականի փոխանցմամբ՝ «Ֆորմուլա-1»-ի Բահրեյնի Գրան պրին կարող է կրկին հետաձգվել կամ ընդհանրապես չանցկացվել:
Օրերս Ավտոսպորտի միջազգային ֆեդերացիան (FIA) պաշտոնապես հայտարարել է, որ Բահրեյնի Գրան պրին անցկացվելու է գալիք շաբաթ-կիրակի օրերին, սակայն Բահրեյնում կրկին քաղաքական լարվածությունը ուժեղանում է: Որոշ բահրեյնցիներ հայտնել են, որ պատրաստվում են «երեքօրյա անեծքի» հավաքներ կազմակերպել վազքուղու շրջակայքում:
Նրանք չեն պատրաստվում խանգարել մրցաշարին, սակայն ցանկանում են աշխարհի ուշադրությունը սևեռել մահվան 40 դեպքերի վրա, որոնք տեղի են ունեցել վերջին շրջանում` քաղաքական լարվածությունների և բախումների պատճառով:
FIA-ի ներկայացուցիչները մեկնել են Մանամա՝ տեղում պարզելու երկրի քաղաքական վիճակը: «Ֆորմուլա-1»-ի թիմերի ղեկավարները և ավտոարշավորդները Բահրեյն կժամանեն չորեքշաբթի, իսկ թիմերի ներկայացուցիչները՝ ավելի շուտ:
Իտալական պարբերականի պնդմամբ՝ լարվածությունը կարող է հանգեցնել նրան, որ Բահրեյնում չանցկացվի Գրան պրին: