BBC-ի ռուսական ծառայության փոխանցմամբ՝ ԱՄՆ-ը Իրանից պահանջել է անհապաղ ազատել իրանական ծագում ունեցող իր քաղաքացի Ամիր Միրզաի Հեքմաթիին, որին Թեհրանն անվանում է ամերիկյան Կենտրոնական հետախուզական վարչության (ԿՀՎ) լրտես։
Իրանական հեռուստատեսությամբ արդեն իսկ ցուցադրվել է Հեքմաթիի խոստովանությունը, որում նա նշել է, թե իրանական հատուկ ծառայությունների մեջ ներթափանցելու առաջադրանք էր ստացել։
ԱՄՆ պետդեպարտամենտի ներկայացուցիչը հայտարարել է, որ իրենք փորձել են Հեքմաթիի հետ կապվել Իրանում Շվեյցարիայի դեսպանատան միջոցով (ԱՄՆ-ի և Իրանի միջև դիվանագիտական հարաբերությունների բացակայության պատճառով Իրանում ԱՄՆ-ի շահերը ներկայացնում է Շվեյցարիան.- 1in.am):
Հեքմաթիի ընտանիքը նույնպես բացառում է, որ նա գաղտնի գործակալ է։
Հիշեցնենք, որ իրանական կողմի պնդմամբ՝ Հեքմաթին ծնվել է ԱՄՆ-ի Արիզոնա նահանգում։ 2001 թվականին նա համալրել է ամերիկյան բանակի շարքերը և 10 տարի ստացել հետախուզական կրթություն։ Մինչ Իրան գործուղվելը Հեքմաթին, որը ԿՀՎ-ի գաղտնի փաստաթղթերին ծանոթանալու թույլտվություն է ունեցել, գտնվել է Աֆղանստանի Բահրամ ամերիկյան բազայում։
Ամերիկյան պլանի համաձայն՝ Իրանում իր աշխատանքի սկզբնական փուլում Հեքմաթին պետք է որոշակի օգտակար տեղեկատվություն տրամադրեր իրանական հետախուզությանը, ինչը կնպաստեր նրա բուն գործունեություն ծավալելու համար նպաստավոր պայմանների առաջացմանը, ապա պետք է սկսեր ապատեղեկատվություն տրամադրել Թեհրանին։
Սակայն Իրանի հատուկ ծառայություններին հայտնի է դարձել այդ մասին, և Իրան մուտք գործելու ժամանակ Հեքմաթին ձերբակալվել է։ Նրա ձերբակալության մասին հայտնի է դարձել դեկտեմբերի 17-ին։