Թուրքական Sabah թերթի փոխանցմամբ, Թուրքիայում ահաբեկչական հռչակված ու արգելված «Քրդստանի աշխատավորական» կուսակցության (PKK) ռազմագերիների հարցաքննությունը ցույց է տվել, որ PKK-ն մի շարք միջոցներ է ձեռնարկում իր շարքերից դասալքության դեմ պայքարի համար։
Նշվում է, որ Հյուսիսային Իրաքում բազավորված PKK-ի ղեկավարությունը շարունակ իր զինյալներին ցուցադրում է տարբեր տիպի տանջանքների վերաբերյալ տեսանյութեր՝ ընդգծելով, որ դասալքության դեպքում այդպիսի ճակատագիր է սպասվում նրանց։
Իսկ եթե PKK-ականներին հաջողվում է բռնել դասալիքներին, ապա նրանց ստիպում են թունել փորել կամ գնդակահարում են։ Նշվում է, որ շատ PKK-ականներ քաղցած են մնում՝ սննդի հետ կապված խնդիրների պատճառով։
Բացի այդ, շարքային PKK-ականներին արգելել են թուրքական հեռուստասերիալներ դիտել, որպեսզի չկարոտեն իրենց ընտանեկան օջախը։
Ի դեպ, նշվում է, որ այսօր Դիարբեքիրի նահանգում թուրքական անվտանգության ուժերը սպանել են 20 PKK-ականի՝ նրանց հայտնաբերելով տեղի քարանձավներից մեկում։
Հիշեցնենք, որ օրեր առաջ թուրքական Today’s Zaman թերթը գրել էր, որ Թուրքիայի կառավարությունը նոր ռազմավարություն է մշակել PKK-ի դեմ։ Խոսքը PKK-ի մոտ 300 առավել հեղինակավոր գործիչներին ու դաշտային հրամանատարներին ֆիզիկապես ոչնչացնելու մասին է։
Այս ռազմավարության հեղինակը Թուրքիայի ներկայիս ներքին գործերի նախարարն է՝ Իդրիս Նաիմ Շահինը։ Թուրքական թերթի տվյալներով, պաշտոնական Անկարան հրաժարվել է «Քրդական հարցի» քաղաքական ասպեկտից՝ փոխարենը վճռելով կտրուկ հարձակում ձեռնարկել PKK-ի վերնախավի վրա։ Այդ նպատակով կազմվել է հատուկ «մահվան ցուցակ»։
