Արցախի դեմ Ադրբեջանի լայնածավալ ռազմական ագրեսիային շարունակում են արձագանքել մարզաշխարհի ներկայացուցիչները։ «120 000 հազար քաղաքացիական անձինք, որոնցից 30 000-ը երեխաներ են, ռազմական հարձակումների են ենթարկվում Լեռնային Ղարաբաղում։ Ադրբեջանը վերսկսել է Լեռնային Ղարաբաղի դեմ պատերազմը՝ հրետակոծելով քաղաքացիական անձանց և քաղաքացիական ենթակառուցվածքները՝ 9 ամսվա մտածված շրջափակումից, սովից և մարդասիրական մուտքերի հնարավորությունները մերժելուց հետո։ Ինչպես փորձագետներն են ասում՝ սա ցեղասպանություն է։ Կոչ եմ անում իմ երկրպագուներին, սպորտային աշխարհին և մեդիայի գործընկերներիս արձագանքել և օգնել տարածել խաղաղություն վերահաստատելու ձայնը»,- ֆեյսբուքյան իր էջում գրել է Հայաստանի ազգային հավաքականի նախկին ավագ, Միլանի «Ինտերի» կիսապաշտպան Հենրիխ Մխիթարյանը։ Ադրբեջանի կողմից ռազմական ագրեսիային անդրադարձել է նաև Հայաստանի ազգային հավաքականի մեկ այլ նախկին ֆուտբոլիստ Յուրա Մովսիսյանը․ «Մեր ազգի նկատմամբ անվերջանալի հարձակում է տեղի ունենում, սարսափելի ցեղասպանություն ու այժմ անհրաժեշտ է բարձրացնել մեր ձայնը և խնդրել աշխարհին բացել աչքերն այս հումանիտար ճգնաժամի առաջ:
Անմեղ զոհերն այլևս չեն կարող անտեսվել: Բոլորի բարոյական պարտքն է միասնական դառնալն ու անմիջապես որոշիչ գործողությունների անցնելը՝ տուժածներին փրկելու համար: Իրավիճակը պահանջում է միասնական պայքար ընդդեմ ցեղասպանության, պետք է պաշտպանենք արդարությունն ու աշխատենք, որ նման սարսափելի իրողություններ այլևս թույլ չտանք: Բավական է»։ Ադրբեջանի ցեղասպան գործողությունները դատապարտող հայտարարություններով հանդես են եկել նաև Հայաստանի ազգային հավաքականի ֆուտբոլիստներ Վարազդատ Հարոյանը, Վահան Բիչախչյանը, Հրանտ Լեոն-Ռանոստ, սերբ դարպասապահ Օգնյեն Չանչարևիչը։ Հայտարարությամբ է հանդես եկել նաև Ռուսաստանը ներկայացնող հայազգի թենիսիտ Կարեն Խաչանովը։ Շախմատի Հայաստանի հավաքականի նախկին առաջատար, Օլիմպիադայի եռակի չեմպիոն, ԱՄՆ-ի հավաքականի անդամ Լևոն Արոնյանը սոցիալական ցանցերում արած գրառումով պատասխանել է ադրբեջանցի գրոսմայստեր Շահրիյար Մամեդյարովին, որը հայատյաց քաղաքականությունը արդարացնող նամակով պատասխանել էր Լեւոն Արոնյանի կոչին։ «Թախիծով կարդացի այն, ինչ «դու» գրել ես ինձ։ Քեզ ճանաչում եմ երկար տարիներ ու սիրում եմ քո ընտանիքն ու քեզ որպես հարազատների, թեեւ վերջին շրջանում ինձնից հեռվացած մարդկանց։ Դու երբեք չէիր ասի այն խոսքերը, որոնց տակ քո ստորագրությունն է։ Դու բարի ու հասկացող մարդ ես։ Ես հիմա չեմ ցանկանում հրապարակային պատասխանել իմ հասցեին մեղադրանքներին, դու գիտես ինձ ու գիտես, որ ես երբեք ոչ մեկի չեմ խաբել ոչ անձնական կյանքում, ոչ հրապարակային։ Երբ 30-ականներին Ալյոխինը գրեց պատվիրված հոդված արիական շախմատի մասին, հետո շատ տարիներ փորձում էր ոչնչացնել իր կյանքի այդ ամոթալի էջը։
Տա Աստված, որ դու այլեւս ստիպված չլինես այդպիսի նամակներ գրել»,- գրել է հայ գրոսմայստերը։ Ավելի վաղ Արոնյանը կոչով դիմել էր մարզաշխարհի ներկայացուցիչներին և միջազգային հանրության պահանջելով համարժեք արձագանք ցուցաբերել Արցախում տեղի ունեցող ցեղասպանությանը։ «Դիմում եմ իմ գործընկեր գրոսմայստերներին։ Մենք իրավունք չունենք մեր լռությամբ արդարացնել կատարվողը։ Եվ վստահ եմ, որ իմ ադրբեջանցի գործընկերներն ամենևին հետաքրքրված չեն այն անմարդկային իրավիճակով, որը ղարաբաղցիների համար ստեղծում է Իլհամ Ալիևը։ Եկեք արթնանանք, մարդիկ։ Մենք չենք կարող մեր լռությամբ թույլ տալ մի բան, ինչից մարդկությունը դարեր շարունակ ամաչելու է: Մենք պարտավոր ենք խոսել կատարվածի մասին և լսելի դառնալ նրանց, ովքեր կարող են փոխել այս խայտառակ իրավիճակը»,- ֆեյսբուքյան էջում գրել էր Լևոն Արոնյանը:
Հիշեցնենք՝ սեպտեմբերի 19-ին Ադրբեջանը լայնամասշտաբ հարձակում էր սկսել Արցախի Հանրապետության նկատմամբ՝ օգտագործելով հրետանային միջոցներ և անօդաչու թռչող սարքեր։ Հերթական լայնածավալ ագրեսիայի հետևանքով արձանագրվել էին զոհեր և վիրավորներ և՛ քաղաքացիական անձանց և՛ զինվորական անձնակազմի շրջանում։
