Տոկիոյում կայանալիք ամառային Օլիմպիական խաղերում հայ մարզիկներից ակնկալվում է 3-5 մեդալ։ Այս մասին նախօրեին ՀՀ վարչապետ Նիկոլ Փաշինյանի հետ հանդիպման ժամանակ ասաց ՀԱՕԿ նախագահ Գագիկ Ծառուկյանը։ «Այս անգամ որոշեցինք, որ միայն ուժեղները գնան: Այսօրվա մասնակիցներն ուժեղագույններն են, բոլորն էլ մեդալակիր են, հենց այնպես վարկանիշ ձեռք չեն բերել: Այս անգամ ակնկալում ենք 3-5 մեդալ: Բոլորն էլ չեմպիոներ են, պատրաստվել են, փորձառու են, մասնակցել են և՛ Օլիմպիական, և՛ Աշխարհի և՛ Եվրոպայի առաջնությունների: Իրենց կյանքի նպատակն է, որ կարողանան մասնակցել Օլիմպիական խաղերին, ազգի պատիվը բարձր պահել, եռագույնը բարձրացնել, հիմնը հնչեցնել: Ոչ մի խնդիր չկա, բոլոր հարցերը կառավարության, նախարարության, ֆեդերացիայի և Օլիմպիական կոմիտեի հետ համատեղ կարգավորվել են»,- նշել էր Գագիկ Ծառուկյանը:
Վերջինս մարզական գլխավոր իրադարձությանն ընդառաջ պետության ղեկավարին օբյետիվորեն ներկայացրեց մեր օլիմպիական հավաքականի հնարավորությունը։ Նշենք, որ 2016 թվականին Ռիոյում կայացած օլիմպիական խաղերում Հայաստանի հավաքականը կազմված էր 33 մարզիկներից։ Նախորդ Օլիմպիադայում Հայաստանը նվաճել էր 4 մեդալ՝ մեկ ոսկե և երեք արծաթե։ Օլիմպիական չեմպիոն էր դարձել Արթուր Ալեքսանյանը, իսկ Միհրան Հարությունյանը, Սիմոն Մարտիրոսյանը և Գոռ Մինասյանը նվաճել էին արծաթե մեդալ։ Ստացվում է, որ նախորդ օլիմպիադայի համեմատ Հայաստանի հավաքականի կազմը մոտ երկու անգամ նվազել է։ 17 մարզիկներից կազմված հավաքականից, սակայն ակնկալում ենք կրկնել այն արդյունքը, որը արձանագրվել էր 5 տարի առաջ։ Ասել, որ Ծառուկյանը մեր մարզիկների հնարավորությունները գերագնահատում է միանգամայն ճիշտ չի լինի։ 17 մարզիկներից 10-ին կարելի է մեդալի պոտենցիալ հավակնորդ համարել։ Հիշեցնենք, որ Տոկիոյում Հայաստանը կներկայացնեն հունահռոմեական ոճի ըմբիշներ Արմեն Մելիքյանը (60 կգ), Կարեն Ասլանյանը (67 կգ), Կարապետ Չալյանը / 77 կգ /, Արթուր Ալեքսանյանը / 97 կգ /, ազատ ոճայիններ Արսեն Հարությունյանը / 57 կգ / Վազգեն Թևանյանը / 65 կգ /, բռնցքամարտիկներ Կորյուն Սողոմոնյանը / 52 կգ / , Հովհաննես Բաչկովը / 63կգ / Արման Դարչինյանը / 75 կգ /, սպորտային մարմնամարզիկ Արթուր Դավթյանը, հրաձգուհի Էլմիրա Կարապետյանը, ծանրորդներ Իզաբելա Յայլյանը / 59 կգ /, Սիմոն Մարտիրոսյանը / 109կգ / , ձյուդոիստ Ֆերդինանդ Կարապետյանը / 73 կգ/, լողորդներ Արթուր Բարսեղյանը, Վարսենիկ Մանուչարյանը, եռացատկորդ Լևոն Աղասյանը:
Այս մարզիկներից Արթուր Ալեքսանյանին, Սիմոն Մարտիրոսյանին, Վազգեն Թևանյանին, Արսեն Հարությունյանին կարելի է համարել ոսկե մեդալի հավակնորդներ։ Մեդալներ ենք ակնկալում Կարապետ Չալյանից, Հովհաննես Բաչկովից, Կորյուն Սողոմոնյանից, Արթուր Դավթյանից, Արման Մելիքյանից, Կարեն Ասլանյանից, Ֆերդինանդ Կարապետյանից։ Միանգամայն օբյեկտիվ գնահատելով մերոնց հնարավորությունները կարող ենք ասել, որ Ծառուկյանի ակնկալիքները Տոկիոյում ինչ-որ տեղ նաև համեստ կարելի է համարել։ Ամեն դեպքում ներկայիս ծանր պայմաններում 3-5 մեդալը մեր պետության համար լուրջ հաջողություն կլինի։ Ինչ խոսք էական նշանակություն ունի թե ինչ որակի մեդալներ կնվաճենք։
Անկախ Հայաստանը այս պահին ունի միայն ընդամենը երկու օլիմպիական չեմպիոններ՝ ի դեմս Արմեն Նազարյանի և Արթուր Ալեքասնյանի։ Եթե Տոկիոյում հաջողվի նվաճել միայն երկու ոսկե մեդալ, դա մեր երկրի համար կլինի պատմական հաջողություն։
