Եվրոպայի գործող չեմպիոն Պորտուգալիայի ազգային հավաքականը դուրս մնաց Եվրո-2020-ից։ Քառորդ եզրափակչում պորտուգալացիները նվազագույն հաշվով զիջեց բելգիացիներին։ Սևիլիայում կայացած խաղի մեկնարկային րոպեներին երկու թիմերն էլ հավասարակշռված խաղ էին ցուցադրում: Հավաքականներն ամբողջապես կենտրոնանում էին պաշտպանության վրա: Բելգիան կարողացավ օգտագործել իր շանս առաջին կեսի վերջնամասում: 42-րդ րոպեին հեռահար, դիպուկ, ուժեղ հարվածով աչքի ընկավ Տորգան Ազարը: Երկրորդ կեսում Պորտուգալիան առավել մեծ ուժերով էր նետվում գրոհների և մի քանի իրական գոլային պահեր ուներ: Բելգիան էլ երբեմն-երբեմն հակագրոհում էր: Խաղի վերջնամասում լարված պայքար էր: Պորտուգալիան արժանի էր խփել պատասխան գնդակը բայց․․․։ Ժամանակակից ֆուտբոլում պրագմատիզմն ու պրոֆեսիոնալիզմը գերակա է։ Բացառությամբ Կիրշտիանու Ռոնալդուի այս հավաքականում այսօր չկան կատարողական բարձր որակներով օժտված վարպետներ։ Պորտուգալիան ուներ դարպասը գրավելու բազմաթիվ հնարավորություններ, բայց վերջին պահին ինչ-որ բան չէր ստացվում։ «Մենք հիասթափված ենք ու հուսահատված: Ֆուտբոլիստներից մի քանիսը լաց էին լինում հանդերձարանում: Խաղացողները ներդրեցին բոլոր ուժերը: Ցանկանում էինք դուրս գալ հաջորդ փուլ և հավատում էինք դրան:
Այստեղ չկա արդարություն կամ անարդարություն, պարզապես գոլ բաց թողեցինք և չկարողացանք իրացնել մեր պահերը: Ռոնալդուն 5 գոլ է խփել այս մրցաշարում: Այս խաղում մենք կատարեցինք 26 հարված: Կրիշտիանուն պայքարում էր, նա իսկական ավագ էր և ներդրեց բոլոր ուժերը»,- խաղից հետո ասել է Պորտուգալիայի հավաքականի գլխավոր մարզիչ Ֆերնանդո Սանտուշը։ Ինչևէ քառորդ եզրափակչում Բելգիան կմրցի Իտալիայի ազգային թիմի հետ, որը 1/8-դր եզրափակչում լրացուցիչ ժամանակում 2։1 հաշվով հաղթել էր Ավստրիային։ Առաջիկա հանդիպմանը բելգիացիները կներկայանան լուրջ կորուստներով։ Բելգիայի դարպասապահ Տիբո Կուրտուան անդրադարձել է իր թիմակիցներ Էդեն Ազարի ու Կևին դե Բրույնեի վնասվածքներին:Այս ֆուտբոլիստներն էլ դաշտ էին դուրս եկել Բելգիայի հավաքականի մեկնարկային կազմում, սակայն վնասվածքի պատճառով չկարողացան ավարտին հասցնել հանդիպումը: «Մանչեսթեր Սիթիի» կիսապաշտպան Դե Բրույնեն փոխարինվեց 48-րդ րոպեին, իսկ Մադրիդի «Ռեալի» հարձակվող Ազարը՝ 87-րդ րոպեին:«Վախենամ՝ Եվրոպայի առաջնությունն ավարտված է Ազարի համար: Եթե դա նույնիսկ սպազմ է, վերականգնման համար կպահանջվի մոտ 10 օր: Հրաշք պետք է տեղի ունենա, որպեսզի այս մրցաշարում դարձյալ նրան տեսնենք դաշտում: Ինչ վերաբերում է Դե Բրույնեին, ապա նա չի կարողանում ոտքը դնել գետնին»,- նշել է Կուրտուան։
Ինչևէ, երեկ տեղի ունեցած 1/8-րդ եզրափակչի մյուս խաղում փոքրիկ սենսացիայի հեղինակ դարձավ Չեխիայի հավաքականը պայքարից դուրս թողնելով մրցաշարի գլխավոր ֆավորիտներից Հոլանդիային։ Բուդապեշտում կայացած խաղի առաջին կեսում թիմերը աչալուրջ էին գործում թե պաշտպանությունում և թե հարձակման ընթացքում: Վիճակագրությամբ չնչին առավելություն ուներ Հոլանդիան: Թիմերն առաջին 45 րոպեներին այդպես էլ չօգտագործեցին իրենց հնարավորությունները: Երկրորդ կեսի մեկնարկում հանդիպման ընթացքը կտրուկ փոխվեց: Կարմիր քարտ ստացավ և հեռացվեց Մատիաս դե Լիխը: Հոլանդիայի ընտրանին մնաց 10 ֆուտբոլիստով: Չեխերն օգտագործեցին թվային առավելությունը և խաղի 68-րդ րոպեին առաջ անցան հաշվի մեջ: Աչքի ընկավ Գոլեշը: Հոլանդացիները ոչ միայն չկարողացան հետ բերել կորցրածը, այլ նաև երկրորդ գնդակը բաց թողեց: Շիկը 80-րդ րոպեին խփեց չեխերի երկրորդ գնդակը: Հանուն արդարության նշենք, որ չնայած քանակական առավելությանը, Չեխիայի հավաքականը ցուցադրեց գրագետ՝ որակյալ ֆուտբոլ և արժանի էր հաղթանակին։ Ինչպես Պորտուգալիայում, այդպես էլ Հոլանդիայում գրոհների եզրափակիչ մասը չէր ստացվում։ Այս խաղում ևս պրագմատիզմը հաղթեց։ «Բարդ մրցակից էր, սակայն կարծում եմ՝ մինչև հեռացումը մենք ավելի լավ տեսք ունեինք: Տիրում էիք նախաձեռնությանը, հատկապես առաջին խաղակեսում:Նման հանդիպումների արդյունքը պայմանավորված է մեկ կամ երկու դրվագով: Մալենն ուներ մեկը, իսկ մի քանի վայրկյան անց մենք մնացինք 10 ֆուտբոլիստով:Ամենավատ բանը, որ կարող է պատահել նման մրցակցի դեմ խաղում, գնդակ բաց թողնելն էր: Դրանից հետո նրանք խաղացին այնպես, ինչպես ուզում էին: Իսկ երբ ես պատրաստվում էի անցում կատարել 3-3-3 սխեմային, նրանք խփեցին երկրորդ գոլը»,- ասել է Հոլանդիայի հավաքականի գլխավոր մարզիչ Ֆանկ դե Բուրը։
Քառորդ եզրափակչում Չեխիան կմրցի Դանիայի հավաքականի հետ, որը 1/8-դ եզրափակչում 4։0 հաշվով հաղթել էր Ուելսին։
