13 տարվա ընդմիջումից հետո Երևանի «Արարատը» նվաճեց Հայաստանի գավաթը։ Վազգեն Սարգսյանի անվան «Հանրապետական» մարզադաշտում տեղի ունեցած «Ալաշկերտի» դեմ մրցավեճում «Արարատը» ցույց տվեց վառ և տակտիկապես գրագետ ֆուտբոլ։ Խաղի մեկնարկային րոպեներին «Արարատը» կարողացավ օգտագործել հնարավորությունն ու առաջ անցավ հաշվի մեջ: Դիպուկ և հեռահար հարվածով աչքի ընկավ Աղվան Պապիկյանը: «Արարատից» երկար ժամանակ չպահանջվեց հաշվի տարբերությունը կրկնապատկելու համար: Իր պահն օգտագործեց Մորի Կոնեն: Թիմերն ընդմիջման գնացին 2։0 հաշվով հօգուտ «Արարատի»: Երկրորդ կեսի մեկնարկից «Արարատը» նորից տիրեց նախաձեռնությանը և խփեց երրորդ գնդակը: Դուբլի հեղինակ դարձավ Մորի Կոնեն: «Ալաշկերտից» հեղինակության գնդակը 85-րդ րոպեին խփեց Միհրան Մանասյանը: «Ալաշկերտին», սակայն, չհաջողվեց հետ բերել կորցրածը։ «Արարատը» Հայաստանի գավաթակիր դարձել էր նաև 1993, 1994, 1995, 1997, 2008 թվականներին:
«Շնորհավորում եմ «Արարատի» հավաքարարներից մինչև ղեկավարություն: Երկար սպասված հաղթանակ էր: Մենք կարողացանք տարիների բացը լրացնել` այսօր դառնալով գավաթակիր: Առանձնակի ուզում եմ շնորհակալություն հայտնել ֆուտբոլիստներին․ նախևառաջ սա նրանց քրտնաջան աշխատանքի արդյունքն է։ Երևի՝ ամենալավը ես գիտեմ, թե ֆուտբոլիստները որքան են չարչարվել գավաթակիր դառնալու համար։ Եվս մեկ անգամ շնորհակալություն եմ հայտնում ֆուտբոլիստներին անմնացորդ նվիրումի և իրենց կատարած ահռելի աշխատանքի համար։Կարծում եմ եթե երկար ժամանակ թիմին չի հաջողվում տիտղոս նվաճել, լարվածությունը տարեցտարի մեծանում է, բայց փառք ու պատիվ այս ֆուտբոլիստներին, որ կարողացան հավատալ սեփական ուժերին ու կարողացանք այս տարիների բացն այսօր լրացնել դաշտում։Նաև ուզում եմ շնորհակալություն հայտնել մարզչական անձնակազմին՝ մեծ ծավալի աշխատանքի համար։ Շնորհակալություն բժշկական անձնակազմին, քանի որ այս վերջին հատվածում բավականին խիտ գրաֆիկով խաղալու դեպքում երևի՝ ամենակարևոր դերակատարը դառնում է բժշկական անձնակազմը․ նրանք ձեռքի տակ ունեցած ռեսուրսներով շատ քիչ ժամանակում փորձում են ամեն ինչ անել, որպեսզի ֆուտբոլիստներն արագ վերականգնվեն և պատրաստ լինեն»,- խաղից հետո լրագրողների հետ զրույցում ասաց «Արարատի» գլխավոր մարզիչ Վարդան Բիչախչյանը։ «Ալաշկերտի» գլխավոր մարզիչ Աբրահամ Խաշմանյանը «Արարատի» հաղթանակը տրամաբանական համարեց․ «Հանդիպումը մեզ համար հաջող չդասավորվեց հենց խաղի սկզբից, քանի որ արագ գոլ բաց թողեցինք: Փորձեցինք շտկել իրավիճակը, բայց «Արարատն» օգտագործեց իր արագ հակագրոհը և խփեց իր երկրորդ գնդակը»: Խաշմանյանի խոսքով երկրորդ կեսում «Ալաշկերտն» ուներ տարածքային առավելություն, բայց հաշիվը թույլ չէր տալիս առավել հստակ գործել: «Մենք հաջող չխաղացինք այսօր և տրամաբանական էր «Արարատի» հաղթանակը»,-ասաց նա:
Ինչևէ տևական դադարից հետո եվրագավաթների խաղարկությունում Հայաստանը կներկայացնի լեգենդար «Արարատը»։ Սա կարելի է մեծ իրադարձություն համարել։ Տասնամյակներ շարունակ հայկական ֆուտբոլը ճանաչել են «Արարատով»։ Երևանյան թիմն ունի երկրպագուների մեծ բանակ և վերջին հաջողությունը աշխուժություն է առաջացրել նաև ֆուտբոլասերների շրջանում։ Նշենք, որ «Արարատը» պայքար է մղում նաև Հայաստանի չեմպիոնի կոչման համար։ Մասնավորապես, VBET Պրեմիեր լիգայի վերջին չորս հանդիպումներում նույնքան հաղթանակ տանելու պարագայում Բիչախչյանի թիմը կզբաեցնի առաջին հորիզոնականը ձևակերպելով ոսկե դուբլ։ Արդեն մայիսի 19-ին «Արարատը» ֆուտբոլի ակադեմիայում հյուրընկալվելու է «Արարատ-Արմենիային», մայիսի 22-ին 15-րդ տուրից հետաձգված խաղում հյուրընկալվելու է «Ուրարտուին», մայիսի 25-ին էլ 3-րդ տուրից հետաձգված խաղում Վ․ Սարգսյանի անվան «Հանրապետական» մարզադաշտում մրցելու է «Ալաշկերտի» հետ։ Վերջին հանդիպումը «Արարատը» կանցկացնի մայիսի 28-ին Երևանում մրցելով «Շիրակի» հետ։ Անկախ նրանից թե ինչ դիրք կզբաղեցնի «Արարատը» Հայաստանի առաջնությունում, կարող ենք արձանագրել, որ ՀՀ գավաթակիրը ընթացիկ մրցաշրջանում նոր շունչ հաղորդեց հայկական ֆուտբոլին։ Ի դեմս «Արարատի» ունենք մարտունակ հստակ խաղային ձեռագրով կոլեկտիվ, որը ասելիք ունի առնվազն Եվրոպա լիգայի խաղարկությունում։
Ի դեպ, Եզրափակիչ հանդիպմանը ներկա էր նաև Հայաստանի ազգային հավաքականի գլխավոր մարզիչ Խոակին Կապառոսը։ «Արարատում» կան ֆուտբոլիստներ որոնք կարող են օտգակար լինել մեր գլխավոր թիմին։ Խոսքը վերաբերվում է Աղվան Պապիկյանին, Ժիրայր Մարգարյանին և Կարեն Մուրադյանին։ Վերջինս Կապառոսի կողմից մի քանի անգամ հրավիրվել է ազգային թիմ, իսկ Ռումինիայի դեմ վերջին խաղում խաղադաշտ էր դուրս եկել մեկնարկային կազմում։
