Հայաստանի ազգային հավաքականը շարունակում է մնալ համաշխարհային ֆուտբոլային գլխավոր գերատեսչության՝ ՖԻՖԱ-ի ուշադրության կենտրոնում։ Աշխարհի առաջնության ընտրական փուլում մեր հավաքականի հաղթանակները պատմական և շոկային որակելուց հետո, ՖԻՖԱ-ի պաշտոնական կայքը հրապարակել է հարցազրույց մեր ազգային թիմի գլխավոր մարզիչ Խոակին Կապառոսի հետ։ Հիշեցնենք, որ օրեր առաջ ՖԻՖԱ-ի հրապարակած դասակարգման աղյուսակում Հայաստանի հավաքականը, առաջադիմելով 9 աստիճանով՝ հանգրվանել էր 90-րդ հորիզոնականում։ Եվրոպայի կտրվածքով մեր հավաքականի վերելքը առաջինն էր Եվրոպայում։ Աշխարհի առաջնության ընտրական փուլի մեկնարկում էլ մեր գլխավոր թիմը պատմական արդյունք էր գրանցել՝ տանելով երեք անընդմեջ հաղթանակ։ «Կապառոսը հպարտ է Հայաստանի այս հավաքականով ու նրանց արած աշխատանքով։ Հետաքրքիր կլինի տեսնել՝ որքան հեռու նրանք կարող են գնալ»,- գրում է ՖԻՖԱ-ի պաշտոնական կայքը։ Վերջինս Հայաստանի հավաքականի վերջին հաջողությունները կապում է գլխավոր մարզչի ֆակտորով։ Հայտնի մասնագետ, որը, փոքր երկրի հավաքականի հեղինակությունը բարձրացնելուց զատ, ըստ էության հայտ է ներկայացրել համաշխարհային ֆուտբոլում։
«Դեռ պայմանագիր ունեի «Սևիլիայի» հետ, բայց ՀՖՖ-ի տեխնիկական տնօրեն Խինես Մելենդեսն ասաց ինձ Հայաստանի հնարավորության մասին, և ես հանդիպեցի նրան ու ֆեդերացիայի նախագահին։ Դրական էմոցիաներ և աջակցելու զգացում կար, հետևաբար զարկ տվեցինք գործին ու բավականին արագ եկանք համաձայնության։ Նրանք վստահում են մեզ, ու հեշտ հաղորդակցվում ենք»,- նշել է Կապառոսը։ Իսպանացի մասնագետը անդրադարձել է նաև աշխարհի առաջնության եզրափակիչ փուլի ուղեգրի պայքարում մեր հավաքականի հնարավորություններին: «Աշխարհի առաջնության որակավորման փուլը սկսեցինք մեծ խանդավառությամբ, բայց զգուշավոր ենք, գիտակցելով՝ որքան բարդ խմբում ենք: Լավ ենք մեկնարկել, սակայն մեր ոտքերը չենք կտրում գետնից: Մրցում ենք այնպիսի թիմերի հետ, ինչպիսիք են Ռումինիան, Իսլանդիան, Հյուսիսային Մակեդոնիան ու հատկապես Գերմանիան, որոնք բոլորն էլ շատ ուժեղ են: Գտնվում ենք նրանց շարքում, բայց լիահույս ենք ու ոգևորված, և դա ոչ ոք չի կարող խլել մեզնից: Հաջորդ մրցավեճերը կկայանան միայն սեպտեմբերին, ուստի կտեսնենք՝ ինչպես կընթանան խաղացողների գործերը: Հույս ենք դրել թիմային ուժի, ինչպես նաև մտավոր ամրության վրա: Ուրախություն է ազգային թիմի հավաքներին մասնակցելը և հավաքականի տղաների հետ լինելը, քանի որ նրանք շատ նվիրված են իրենց գործին: Լավ է, որ հայտնվել ենք խմբում, որտեղ խենթ արդյունքներ են գրանցվում, բայց գիտակցում ենք՝ առջևում շատ բարդ է լինելու: Խոսում ենք այնպիսի մրցակիցների մասին, որոնք շատ լավ խաղացողներ և մեծ պատմություն ունեն, ինչպես, օրինակ, Գերմանիան, որը միշտ ֆավորիտ է։ Ազգերի լիգայում հաղթանակն արդեն իսկ շատ հուզական էր, ուստի կարող եմ միայն պատկերացնել՝ ինչի նման կլինի աշխարհի առաջնության եզրափակիչ փուլ դուրս գալը: Սակայն ես նույնիսկ չեմ մտածել այդ մասին: Ֆուտբոլում եմ երկար տարիներ, ուստի գիտեմ, որ մենք պետք է քայլ առ քայլ գնանք առաջ, իսկ հետո կտեսնենք՝ ուր ենք հասել: Հետևաբար, թույլ տվեք հայերին վայելել հաղթանակները, իսկ մենք կկենտրոնանանք մեր աշխատանքի մեթոդների վրա»,- ասել է Կապառոսը: Ավելի վաղ Կապառոսի և Հայաստանի հավաքականի հաջողություններին անդրադարձել էր իսպանական հեղինակավոր Marca պարբերականը։ «Խոակին Կապառոսն արդեն հայ է։ Նա լիակատար հաղթանակ տոնեց Հայաստանի հետ: Լեգենդար մասնագետը Հայաստանի ազգային հավաքականի մարզիչն է, որի հետ նա երեք հաղթանակ է տարել երեք խաղերում՝ 2022 թվականի աշխարհի առաջնության ընտրական փուլում»,- գրել էր Marca-ն:
Ինչևէ, պայքարը աշխարհի առաջնության ընտրական փուլում թևակոխում է ավելի դժվար փուլ։ Եվրոպայում արդեն իսկ մեզ վերաբերվում են որպես հաղթող հավաքականի։ Ետնապահ Հայաստանն արդեն անցյալում է, և մենք պետք է անենք հնարավորինս նոր կարգավիճակում ամուր կանգնելու համար։ Դեռևս անցյալ տարի՝ Կապառոսի գլխավորությամբ, Հայաստանի ազգային հավաքականը պատմական հաջողություն է գրանցել պատերազմական և հետպատերազմական իրավիճակում՝ հաղթող դառնալով Ազգերի լիգայի C դիվիզիոնում։
Կապառոսը Հայաստանի հավաքականի գլխավոր մարզիչներից միակն է, որին հաջողվեց հաղթող դառնալ ընտրական ենթախմբում։ Ավելին, ամիսների ընթացքում մեր Ազգային հավաքականը կերպարանափոխվեց՝ ցուցադրելով բոլորովին նոր որակի ֆուտբոլ։
