Ֆուտբոլի Հայաստանի Բարձրագույն խմբի առաջնությունը բավական հետաքրքիր և ինչ-որ անսպասելի ընթացք է ստացել: 4-րդ տուրից հետո մրցաշարային աղյուսակը գլխավորում է Երևանի «Արարատը», որը նախորդ առաջնությունում զբաղեցրել էր վերջին՝ 9-րդ հորիզոնականը: 4 խաղից հետո «Արարատն» ունի 10 միավոր: Երևանյան ակումբը առաջին երեք խաղում հաղթել էր համապատասխանաբար՝ «Երևանին», «Շիրակին» և «Փյունիկին»: Երեկ «Արարատը» ոչ-ոքի՝ 1:1 խաղաց «Ալաշկերտի» հետ: Ընդ որում, «Արարատը» պատասխան գնդակը խփեց հանդիպման վերջնամասում, երբ մնացել էր 10 ֆուտբոլիստներով:
Երկրորդ հորիզոնականում Հայաստանի գործող չեմպիոն «Արարատ-Արմենիան» է, որը երեք խաղում նույնքան հաղթանակ է տարել: Ոմանք արդեն իսկ շտապում են պնդել, որ ընթացիկ առաջնությունում չեմպիոնի կոչման համար պայքարը ընթանալու է «Արարատ-Արմենիայի» և «Արարատի» միջև: Խոսվում է նաև, որ «Արարատի» շվեյցարահայ սեփականատեր Վարդան Սրմաքեշը ֆուտբոլի դաշտում ցանկանում է ռևանշի հասնել «Արարատ-Արմենիայի» սեփականատեր՝ ռուսաստանաբնակ գործարար Սամվել Կարապետյանի նկատմամբ:
Հիշեցնենք, որ Երևանի «Արարատի» ղեկավարությունը կտրականապես դեմ էր Կարապետյանի թիմի «Արարատ» անվանմանը: ««Արարատ-Արմենիային» միայն մեկ խնդրանք ունեմ, շատ լուրջ: Դա անունը փոխելու վերաբերյալ է: Ես մանկուց «Արարատի» երկրպագու եմ, մարդիկ հայկական ֆուտբոլը Արարատով են ճանաչում: Այն, ինչ կատարվում է հիմա, երբ թիմ բերեցին, անունը դրեցին «Արարատ», ինձ թվում է՝ բոլորի համար ցանկալի չէ: Պատկերացնում եք՝ Անգլիայում նոր թիմ ստեղծվեր, և անունը դնեին «Արսենալ-Անգլիա», և այն խաղար Լոնդոնում: Առաջին հերթին հարկավոր է թղթաբանությամբ թույլտվություն խնդրել այդ անունով ակումբից: Չեմ թաքցնի, Վարդան Սրմաքեշի խնդրանքով հանդիպեցի «Արարատ-Արմենիայի» սեփականատերերի հետ, որ անունը փոխվեր: Դա դեռ այն ժամանակ էր, երբ այդ անունով նոր էին սկսել հանդես գալ: Ցավոք սրտի, չլսեցին: Շատ ուրախ եմ, որ նրանք եկել են հայկական ֆուտբոլ, լուրջ թիմ են կառուցում ու լուրջ ֆուտբոլիստներ բերում, բայց եկեք ամեն ինչ ավելի կոռեկտ անենք, մեր անունը բարձր պահենք»,- վերջերս Առաջին ալիքին տված հարցազրույցում ասել էր Երևանի «Փյունիկի» սեփականատեր Արթուր Սողոմոնյանը:
Ինչևէ, վերջին հանդիպումներում Երևանի «Արարատի» գրանցած արդյունքները և խաղի որակը խոսում են այն մասին, որ հայկական ամենատիտղոսակիր ակումբն իսկապես լուրջ է տրամադրված և կարծես թե պատրաստ է ձեռնոց նետել Հայաստանի գործող չեմպիոնին: «Արարատ-Արմենիան» առաջին անգամ մասնակցելով Հայաստանի Բարձրագույն խմբի առաջնությանը՝ նվաճեց չեմպիոնի տիտղոսը և պատմական հաջողության հասավ Եվրոպա լիգայի խաղարկությունում: Մինչ այս «Արարատ-Արմենիան» Մոսկվայի «Արարատ» անվամբ մասնակցել էր Ռուսաստանի երկրորդ դիվիզիոնի առաջնությանը և հենց առաջին փորձից մեծ առավելությամբ զբաղեցրել էր առաջին հորիզոնականը:
Կարապետյանի «Արարատ-Արմենիայում» պրոֆեսիոնալ մթնոլորտ է, և կան բոլոր նախադրյալները, որ առաջին փորձից թիմը հայտնվի նաև Եվրոպա լիգայի խաղարկության խմբային փուլում: Նախորդ առաջնության սկզբնամասում «Արարատ-Արմենիան» որոշակի խնդիրներ ունեցավ, բայց ակումբի ղեկավարությունը արագ կարգավորեց դրանք: Կարելի է ասել, որ ֆուտբոլային հարթության վրա Սամվել Կարապետյանը նախորդ մրցաշրջանում ուղղակի մանկական մատ էր արել Սրմաքեշին:
Ասել, որ Սրմաքեշը ռեսուրսներ չունի «Արարատը» ոտքի կանգնեցնելու, ուղղակի ծիծաղելի կլինի: Նա հովանավորում է բազմաթիվ ֆուտբոլային ակումբներ: Բոլորովին վերջերս Սրմաքեշը դարձել էր ֆրանսիական «Մարտիգ» ակումբի գլխավոր հովանավոր: Ու հիմա կարծես թե գործարարների դիմակայությունը հայկական ֆուտբոլում նոր ընթացք է ստացել:
Վերջին տարիներին Սրմաքեշի թիմը շարունակ եղել է Բարձրագույն խմբի առաջնության ստորին հատվածում: Կհաջողվի՞ արդյոք շվեյցարահայ գործարարին ռևանշի հասել և նվաճել Հայաստանի չեմպիոնի կոչումը՝ այս պահին դժվար է կանխատեսումներ անել, քանզի «Արարատը» վերջին տարիներին աչքի է ընկել անկայուն ելույթներով, ինչպես նաև անհասկանալի և տարակուսելի երևույթներով: «Արարատի» շուրջը ծագած սկանդալների պակաս ուղղակի չի եղել: Դրանք կարծես սովորական երևույթ էին դարձել: Ակումբի ղեկավարությունը շարունակ հայտարարում էր, որ իմաստ չունի ներդրումներ անելու, քանի դեռ Հայաստանի ֆուտբոլի ֆեդերացիան գլխավորում է Հայրապետյանը: Անցյալ տարի Հայրապետյանը հեռացավ Հայաստանի ֆուտբոլի ֆեդերացիայից, և «Արարատի» ղեկավարությունը կարծես թե լավ հարաբերությունների մեջ է ՀՖՖ նոր ղեկավարության հետ: Թիմում, սակայն, նախորդ մրցաշրջանում ոչինչ չփոխվեց:
«Արարատն» այն ակումբների շարքում է, որը Հայաստանի մասշտաբով ունի երկրպագուների բանակ: Մնում է հուսալ, որ «Արարատում» վերջապես կայունություն կհաստատվի, և երկրպագուները ականատեսը կլինեն առողջ և հետաքրքիր պայքարի:
