Երեկ Նյուպորտում աշխարհահռչակ ամերիկահայ թենիսիստ Անդրե Աղասին պաշտոնապես դարձավ թենիսի համաշխարհային փառքի սրահի անդամ: Այս մասին հաղորդում է ATP-ի պաշտոնական կայքը: Հանդիսավոր արարողության ժամանակ 41-ամյա Աղասին դժվարությամբ է թաքցրել իր հուզմունքը:
«Ես անչափ հուզված եմ: Փոքր ինչ անսովոր է կանգնել այս հարթակում ձեր դիմաց: Ես բավական ուշ եմ սիրել թենիսը, թերևս դա է պատճառը, որ այլ կերպ եմ գնահատում այն: Կյանքում թենիսն ինձ տվել է գրեթե ամեն ինչ: Մենք փոխադարձ ենք միմյանց սիրել. Ես սիրել եմ թենիսը, իսկ թենիսն ինձ է սիրել:
Երբ ես 5 տարեկան էի հայրս ինձ ասաց, որ պետք հաղթեմ Wimbledon-ը: 7 տարեկանում նա ինձ ասաց, որ պետք է հաղթեմ «Մեծ սաղավարտ»-ի բոլոր 4 մրցաշարերը: Անհնար է հաշվել, թե քանի անգամ է հայրս ինձ ասել, որ պետք է դառնամ թենիսի փառքի սրահի անդամ:
Երբ ես 29 տարեկան դարձա, հիշո՞ւմ ես հայրիկ, դու ինձ ասացիր, որ ես պետք է ամուսնանամ Շտեֆի Գրաֆի հետ: Դա լավագույն խորհուրդն էր, որ երբևէ դու ինձ տվել ես: Խնդրում եմ քեզ, երբեք մի դադարի ասել ինձ` ինչ անեմ հետագայում»,- Անդրե Աղասու խոսքերն է մեջբերում ATP-ի պաշտոնական կայքը: