Լոնդոնի «Արսենալը» գործնականում կորցրեց հնարավորությունը Անգլիայի Պրեմիեր լիգայում լավագույն քառյակում հայտնվելու: Նախավերջին՝ 37-րդ տուրում Ունայ Էմերիի ֆուտբոլիստները սեփական հարկի տակ ոչ-ոքի՝ 1:1 խաղացին «Բրայթոնի» հետ: Խաղային գրեթե բոլոր առումներով «Արսենալը» գերազանցեց մրցակցին: Մասնավորապես, պաշտոնական վիճակագրական տվյալների համաձայն՝ գնդակին տիրելու հարաբերակցությունը 71-ը 29-ի տոկոս էր՝ հօգուտ լոնդոնյան թիմի: Դարպասին կատարած հարվածների քանակով էլ «Արսենալի» առավելությունը կազմել է 20-11:
Հիշեցնենք, որ հանդիպման 9-րդ րոպեին Պյեր Էմերի Օբամեյանգը 11 մետրանոց հարվածով առաջ էր մղել «Արսենալին», սակայն 61-րդ րոպեին Մարեյը կրկին 11 մետրանոց հարվածով հավասարեցրել էր այն: Հատկապես ֆորումներում «Արսենալի» չհաղթելու մեղավորների շարքում դասում են Հայաստանի ազգային հավաքականի ավագ Հենրիխ Մխիթարյանին: Հենց նրա սխալ փոխանցումից հետո էր «Բրայթոնը» սուր հակագրոհ կազմակերպել, ինչի հետևանքով էլ Գրանիտ Ջական սեփական տուգանային հրապարակում խախտեց կանոնները:
«Կրկին Մխիթարյանը հարվածելու փոխարեն գնդակը փոխանցեց Լիխշտայներին: Ինչո՞ւ: Խաղի թելը մեր ձեռքում էր, սակայն մեկ կոպիտ սխալը ճակատագրական էր: Մխիթարյան կիսապաշտպանի մոտ հարվածները լավ են ստացվում, սակայն ոչ միշտ է նա համարձակվում իր վրա վերցնել խաղը»,- գրել է «Արսենալի» երկրպագուներից @Karen_s-ն:
Վերլուծելով տվյալ դրվագը՝ փորձենք հասկանալ, թե որքան էր խփված գոլի մեջ Մխիթարյանի մեղքի բաժինը: Հայաստանի ազգային հավաքականի ավագը, մոտենալով տուգանային հրապարակի մատույցներին, ընտրեց գրոհը աջ եզրով զարգացնելու տարբերակը: Մեր ֆուտբոլիստի փոխանցումը չստացվեց, սակայն տվյալ փոխանցումը ճակատագրական սխալ որակելը, կարծում ենք, անհեթեթություն է:
«Բրայթոնի» դեմ «Արսենալի» աջ պաշտպանի պարտականությունը կատարում էր շվեյցարացի Ստեֆան Լիխշտայները: Մխիթարյանի ոչ ճշգրիտ փոխանցումից հետո այս ֆուտբոլիստը չարձագանքեց «Բրայթոնի» հակագրոհին, չնայած այն զարգանում էր հենց «Արսենալի» պաշտպանության աջ եզրով: «Բրայթոնի» ֆուտբոլիստին փորձեցին կասեցնել Ջական և Մխիթարյանը: 11 մետրանոցի դրվագում Լիխշտայներն ուղղակի տեսանելի չէր: Եթե իրավիճակն ավելի խորը վերլուծենք, ապա կստանանք բավական տարօրինակ, միևնույն ժամանակ հասկանալի պատկեր:
Վերջին անգամ Ստեֆան Լիխշտայները «Արսենալի» կազմում խաղադաշտ էր դուրս եկել այս տարվա փետրվարի 24-ին՝ 55 րոպե խաղալով Պրեմիեր լիգայի 27-րդ տուրի «Սաութհեմփթոնի» հետ մրցավեճին: Կարծում ենք՝ հասկանալի է, թե ինչու շվեյցարացի պաշտպանը տվյալ դրվագում կորցրեց դիրքը՝ չհասցնելով նահանջել: Տարօրինակ է, սակայն, թե ինչու էր Ունայ Էմերին մոտ 2.5 ամիս չխաղացած ֆուտբոլիստին նման պատասխանատու խաղում ընդգրկել մեկնարկային կազմում: Կարծում ենք՝ չենք սխալվի, եթե պնդենք, որ «Արսենալի» ընդունած գոլի գլխավոր մեղավորը հենց Էմերին է, որը միանգամայն անպատրաստ ֆուտբոլիստին ընդգրկել էր մեկնարկային կազմում:
Ինչ վերաբերում է Մխիթարյանին, ապա ընդհանուր առմամբ նա վատ հանդիպում չանցկացրեց: Երկրորդ կեսում նրա հիանալի փոխանցումից հետո Օբամեյանգը չօգտագործեց 100 տոկոսանոց գոլային պահը: Նույն հաջողությամբ «Արսենալի» ձախողման մեջ կարելի է մեղադրել նաև Օբամեյանգին:
Ուշադրություն դարձնենք ևս մեկ հետաքրքիր դրվագի: 77-րդ րոպեին Էմերին փոխարինեց բաց թողած գոլին առնչություն ունեցած երեք ֆուտբոլիստներին՝ Մխիթարյանին, Լիխշտայներին և Ջակային: Նման մակարդակի հանդիպումներում դժվար է հիշել մի դեպք, երբ մարզիչը հանդիպման վերջնամասում միանգամից 3 փոփոխություն կատարի: Ընդ որում, օդի և ջրի պես հաղթանակի անհրաժեշտություն ունեցող թիմի մարզիչը 77-րդ րոպեին խաղադաշտ դուրս բերեց պաշտպանի, հենակետային կիսապաշտպանի և եզրային կիսապաշտպանի: Այս փոփոխությունից հետո «Արսենալի» խաղը վերջնականապես քանդվեց: Փոխարինելով վերը նշված երեք ֆուտբոլիստներին՝ Էմերին անուղղակի կերպով իր դժգոհությունը հայտնեց նրանցից՝ կամա թե ակամա հենց նրանց համարելով ձախողման մեղավորներ: Ցայտնոտային այս քայլը, սակայն, նորից ցույց տվեց, որ անհաջողության հիմնական մեղավորը հենց գլխավոր մարզիչն էր, որի քայլերը հասկանալն ու մեկնաբանելը բավական բարդ է:
Այս պահին «Արսենալը» 67 միավորով 5-րդ հորիզոնականում է և վերջին տուրից առաջ 3 միավորով զիջում է 4-րդ հորիզոնականում գտնվող «Տոտենհեմին»: 3-րդ հորիզոնականում գտնվող «Չելսին» ունի 71 միավոր և արդեն ապահովել է տեղը լավագույն քառյակում, որը հնարավորություն կտա մասնակցելու Չեմպիոնների լիգայի խաղարկության խմբային փուլին:
«Մենք ամեն ինչ արեցինք լավագույն քառյակում հայտնվելու համար, սակայն բաց թողեցինք հնարավորությունը: Այս խաղից հետո մեր նպատակը մեկն է` հաղթել Եվրոպա լիգայում: Այս կերպ մենք կկարողանանք Չեմպիոնների լիգայի ուղեգիր նվաճել»,- ասել է Էմերին:
Մայիսի 9-ին «Արսենալը» Եվրոպա լիգայի խաղարկության կիսաեզրափակչի պատասխան խաղում կհյուրընկալվի «Վալենսիային»: Եվրոպա լիգայի խաղարկության եզրափակիչը տեղի կունենա մայիսի 29-ին Բաքվի «Օլիմպիական» մարզադաշտում:
