Այսօր գիշերը կայացան Ամերիկայի գավաթի խաղարկության B խմբի առաջին հանդիպումները: Եթե Պարագվայ-Էկվադոր հանդիպման գոլազուրկ ոչ-ոքի արդյունքը կարելի է որոշակիորեն տրամաբանական համարել, ապա Բրազիլիա-Վենեսուելա հանդիպման 0:0 հաշիվը իրապես սենսացիա էր:
Բրազիլացիները մեկնարկային րոպեներից անցան բուռն գրոհների և արդեն առաջին խաղակեսի միջնամասում հաշիվը կարող էր խոշոր լինել, սակայն ամեն անգամ գրոհի եզրափակիչ փուլում ինչ-որ բան չէր հերիքում Մենեզեսի սաներին: 2-րդ րոպեին Ռոբինիոյի հարվածից հետո գնդակը որսաց Վենեսուելայի դարպասապահ Վեգան, 3 րոպե անց Նեյմարն էր պարտավոր բացել հաշիվը, բայց, չգիտես ինչու, չհարվածեց, որոշեց ևս երկուսին շրջանցել ու գնդակով հայտնվել դարպասում՝ չստացվեց: Երկու հնարավորություն էլ կորցրեց Պատոն. մի դեպքում նրա հարվածից հետո գնդակը ցնցեց դարպասաձողը, մյուս դեպքում բրազիլացին մեն-մենակ դուրս եկավ Վեգայի առաջ ու չկարողացավ շրջանցել նրան:
Վենեսուելացիների խնդիրը շատ պարզ էր այս խաղում՝ ոչ մի պարագայում գոլ չընդունել:
Ի տարբերություն առաջին խաղակեսի, ընդմիջումից հետո բրազիլացիների անընդմեջ գրոհները կորցրին սրությունը, ու մրցակցի գործը հեշտացավ: Վենեսուելայի թիմը անգամ կիսադաշտը հատելու փորձեր կատարեց: Ինչևէ, վենեսուելացիները հասան իրենց նպատակին. հանդիպումն ավարտվեց ոչ-ոքի՝ 0։0 հաշվով: Առաջին տուրից հետո B խմբի բոլոր թիմերն իրենց ակտիվում ունեն 1 միավոր:
