Նախօրեին լրագրողների հարցերին պատասխանելիս Բարձրագույն դատական խորհրդի նախագահ, ՍԴ նախկին նախագահ Գագիկ Հարությունյանը ուշագրավ դիտարկում է արել։ Նրա խոսքով՝ եթե ԱԺ-ն առաջնորդվեր Սահմանադրության տրամաբանությամբ, ապա կարող էր հավաքվել և 92-րդ հոդվածով հաղթահարեր ճգնաժամը, որովհետև դրա հնարավորությունը տալիս է Սահմանադրության 92-րդ հոդվածը, որտեղ կարող էր փոփոխություն կատարվել, և այդ փոփոխությունը հանրաքվեով չի արվում: Գագիկ Հարությունյանի հայտարարությունն ուշագրավ է հատկապես նրանով, որ նա եղել է սահմանադրական փոփոխությունների հեղինակներից մեկը և, անշուշտ, լավագույնս տիրապետում է Մայր օրենքի բոլոր խութերին ու հնարավորություններին։ Հարությունյանը Փաշինյանին, ըստ էության, առաջարկում է արտահերթ ընտրությունների հասնել՝ շրջանցելով հրաժարականի տարբերակը։ Արդյո՞ք Հարությունյանը փորձել է այս տարբերակի մասին Փաշինյանին ավելի շուտ տեղեկացնել, թե՞ սպասել է իրադարձությունների զարգացմանը և հիմա հրապարակայնացնում է դրա մասին, քանի որ հոկտեմբերի 2-ի իրադարձություններից հետո այլևս համոզված է հակահեղափոխության պարտության հարցում։
Թեմայի շուրջ «Առաջին լրատվական»- ի հետ քննարկմանը մասնակացեցին ԱԺ ՀՀԿ խմբակցության պատգամավոր Գագիկ Մինասյանը, Աժ «Ելք» խմբակցության պատգամավոր Հովիկ Աղազարյանը և «Ծառուկյան» խմբակցության պատգամավոր Գևորգ Պետրոսյանը:
«Գնացքն արդեն գնացել է, վարչապետը հայտարարել է այն տարբերակը, որով ինքը գնալու է, դա հրաժարականն է, և կարծեք թե չկա խորհրդարանական որևէ ուժ, որը մտադրություն ունի առաջարկելու վարչապետի թեկնածու»,- նշեց Գ. Մինասյանը:
Գ. Պետրոսյանը հավելեց, որ ստեղծվել է մի իրավիճակ, որ պետք է առաջ շարժվել, և այս իրավիճակում ամեն ինչ կախված է վարչապետի հրաժարականից:
Հ. Աղազարյանի խոսքով՝ այս պահին միակ տարբերակը մնում է հրաժարականը: Նրա կարծիքով՝ վարչապետի հրաժարականն այնքան էլ ընդունելի տարբերակ չէ. «Եթե ՀՀԿ-ն քաղաքական պատրաստակամություն ունենար, կար առավել հեշտ ճանապարհ՝ սահմանադրական փոփոխություններ իրականացնել առանց հանրաքվեի, բայց այդ պատրաստակամությունը բացակայում է, և միակ տարբերակը մնում է վարչապետի հրաժարականը»:
Քննարկման մասնակիցներն անդրադարձան նաև հարցին, թե ինչ ռիսկեր են պարունակում վարչապետի հրաժարականը և արտահերթ խորհրդարանական ընտրությունները դեկտեմբերին անցկացնելը:
Գ. Մինասյանը հավաստիացրեց, որ ՀՀԿ-ն չի խոչընդոտելու ընտրությունները դեկտեմբերին անցակցնելու գործընթացը:
Մանրմասն՝ տեսանյութում:
