Բասկետբոլի Հայաստանի ազգային հավաքականի գլխավոր մարզիչ Նիկշա Բավցևիչը նախօրեին հրապարակեց այն բասկետբոլիստների անունները, որոնք հրավեր են ստացել նախապատրաստվելու հունիսի 28-ին Դանիայում կայանալիք Եվրոպայի առաջնության նախընտրական փուլի հանդիպմանը: ԵԱ-2021-ի նախընտրական փուլի վերջին խաղում՝ Հայաստանի ազգային հավաքականը հունիսի 28-ին Կոպենհագենում կհյուրընկալվի Դանիայի ազգային հավաքականին: Հայաստանի հավաքականը նախընտրական փուլի առաջիկա խաղին կսկսի նախապատրաստվել հունիսի 15-ից` հանգրվանելով Դավիթաշենում գտնվող «Օլիմպավանում»: Հունիսի 20-ին մեր ընտրանին կմեկնի Բեյրութ, որտեղ հունիսի 21-24-ը կմասնակցի միջազգային մրցաշարի: Միջազգային մրցաշարում Հայաստանի հավաքականը ուժերը կչափի Լիբանանի, Քաթարի և Եգիպտոսի հավաքականների հետ: Նշենք, որ Դանիայի հետ հանդիպումն վերջինն է լինելու նախընտրական փուլում։ Հիշեցնենք, որ Հայաստանի հավաքականը Եվրոպայի առաջնության ընտրական փուլում երկու անգամ հաղթել է Ալբանիայի ընտրանուն և լարված պայքարում լրացուցիչ ժամանակում Երևանում պարտվել Դանիայից։ Առաջիկա հանդիպումներին ինչպես նաև Հայաստանի հավաքականի հետ կապված խնդիրների շուրջ «Առաջին լրատվական»-ը զրուցեց Հայաստանի բասկետբոլի ֆեդերացիայի գլխավոր քարտուղար Արթուր Նազարյանի հետ։
-Պարոն Նազարյան, ի՞նչ վիճակում է Հայաստանի հավաքականը մոտենում առաջիկա հանդիպումներին։
-Կադրային խնդիրներ կան և դեռ պարզ չի ինչ վիճակում կմոտենանք առաջիկա խաղերին: Փաստաթղթերի պատճառով հավաքական չի ժամանի Արկադի Մկրտիչյանը, ով ներկայումս ԱՄՆ ում է և պետք է 2-3 ամիս էլ մնա այնտեղ կարիերայի հետ կապված որոշ հարցեր կարգավորելու համար:Ուսանողական մրցաշարերին մասնակցելու պատճառով չի կարող ժամանել Գարի Չիվիչյանը:Հույս ունեինք, որ Անդրե Սպայթ Մկրտչյանն այս անգամ կմիանա հավաքականին, սակայն նրա մասնակցությունն էլ հարցականի տակ է, քանի որ NBA ում կարիերան շարունակելու հնարավորություն է ստացել ու այժմ գտնվում է Դենվեր Նագեթսի ճամբարում: Անդրանիկ Չրաբաշն էլ ծանր մրցաշրջանից հետո վերականգնողական կուրս է անցնում, քանի որ ծնկի հետ կապված խնդիր ունի: Նրա մասնակցությունն էլ 50-50 է։ Լուկաս Ֆիշերն էլ բավական ծանր մրցաշրջան է անցկացրել եւ չի մասնակցի Լիբանանում կայանալիք միջազգային մրցաշարին: Նա հավաքականին կմիանա միանգամից Դանիայում: Վնասվածք ունի Անդրեյ Կոնստանտինովը, որը չի մասնակցեի Դանիայի հետ մրցավեճին։
-Իսկ ԱՄՆ-ում ելույթ ունեցող մյուս խաղացողները պատրա՞ստ են կարևորագույն մրցավեճին։
Այդ հարցին կկարողանա պատասխանել մարզիչը Լիբանանի մրցաշարից հետո։ Հավաքականը Երևանում կսկսի հավաքվել հունիսի 17-ից, իսկ հունիսի 20-ին կմեկնի Լիբանան:
-Փաստորեն Սամթ Մկրտչյանը կարող է դառնալ առաջին Հայաստանցի բասկետբոլիստը, որը կխաղա NBA-ում՞
Հնարավոր է, մոտ օրերս պարզ կդառնա։
-Ինչպե՞ս կգնահատեք Լիբանանի, Քաթարի և Եգիպտոսի հավաքականներին
Լիբանանի ու Եգիպտոսի հավաքականը բավական ուժեղ մրցակիցներ են:Վերջին տարիներին այս հավաքականներն աչքի են ընկնում բավական լավ արդյունքներով: Ունեն բավական ուժեղ ներքին առաջնություններ։ Քաթարի մասին դժվարանում եմ կարծիք հայտնել:
-Դանիայի հաղթելու դեպքում ի՞նչ է սպասվում Հայաստանի հավաքականին։
Եթե հաղթենք 7 միավորից ավել, ապա կապահովենք մեր տեղը հաջորդ փուլում, իսկ ավելի քիչ միավորներով հաղթելու դեպքում՝ գործնականում կապահովենք մեր տեղը:
-Անդրադառնանք նաև երիտասարդական և պատանեկան հավաքականներին։ Ի՞նչ սպասել այս թիմերից։
Մենք ծրագրել էինք երկարատև ուսումնամարզական հավաքներ անցկացնել 18 և 20 տարեկանների հավաքականների համար՝ Եվրոպայի առաջնությունների մեկնարկից առաջ: Սակայն ֆինանսական խնդիրների պատճառով ստիպված ենք զգալիորեն կրճատել հավաքների անցկացումը: Դեռ կան մի շարք չլուծված հարցեր, որոնք թույլ չեն տալիս լիարժեք նախապատրաստվել կարևոր ստուգատեսներին:
