Հայկական սպորտում երեկ տեղի ունեցավ ևս մեկ նշանակալի իրադարձություն: Ռուսաստանի Կասպիյսկ քաղաքում կայացած հունահռոմեական ոճի Եվրոպայի առաջնությունում ուղղակի ֆանտաստիկ արդյունք գրանցեցին Հայաստանի ներկայացուցիչները:
Օլիմպիական չեմպիոն Արթուր Ալեքսանյանը եզրափակչում 7:0 հաշվով հաղթելով Սերբիայի ներկայացուցիչ Միխեիլ Կաջայային՝ 4-րդ անգամ հռչակվեց Եվրոպայի չեմպիոն: Ի դեպ, Ալեքսանյանը առաջնության ընթացքում ոչ մի միավոր չի զիջել մրցակիցներին, ինչը կարելի է բացառիկ արդյունք գրանցել: Արթուր Ալեքսանյանն առաջին հայ ըմբիշն է, ում հաջողվեց դառնալ Եվրոպայի քառակի չեմպիոն: Նշենք, որ Ալեքսանյանը վերջին անգամ Եվրոպայի առաջնության հաղթող էր դաձել 2014 թվականին: 26-ամյա ըմբիշը, բացի Օլիմպիական և Եվրոպայի քառակի չեմպիոն լինելուց, նաև աշխարհի եռակի չեմպիոն և արծաթե մեդալակիր է: 2012 թվականի Օլիմպիական խաղերում էլ դարձել էր բրոնզե մեդալակիր:
«Առաջին հերթին հպարտ եմ, որ իմ երկրի համար ոսկե մեդալ նվաճեցի: Ժողովրդի աջակցությունը միշտ զգում եմ, և դա ինձ ուժ է տալիս: Շնորհակալ եմ նաև այն հայերին, որոնք ինձ աջակցեցին մրցավայրում: Ցանկացած մրցաշարում լինում են դժվարություններ: Երբ բոլորը քեզնից ոսկե մեդալ են ակնկալում, առաջանում է նաև լարվածություն, քանզի ցանկացած այլ արդյունք որակվում է որպես ձախողում: Առաջին անգամ եմ Դաղստանում, և տպավորությունս դրական է: Ամեն ինչ բարձր մակարդակի վրա է: Առկա են բոլոր անհրաժեշտ պայմանները: Եթե հնարավորություն լինի, մեծ սիրով նորից կգամ Դաղստան»,- wrestrus-ի թղթակցի հետ զրույցում ասել է Ալեքսանյանը:
Կասպիյսկում իր կարիերայի ընթացքում առաջին անգամ Եվրոպայի չեմպիոն դարձավ նաև աշխարհի գործող չեմպիոն Մաքսիմ Մանուկյանը: Եզրափակչում մեր ըմբիշը ջախջախիչ հաղթանակ տարավ Բելառուսի ներկայացուցիչ Վիկտոր Սասունովսկու նկատմամբ՝ գոտեմարտը շահելով 9:0 հաշվով:
Երեկ ունեցանք ևս մեկ մեդալ: Բրոնզե մեդալի համար մենամարտում Կարեն Ասլանյանը 7:2 հաշվով առավելության հասավ լեհ Դավիդ Կարեցինսկու նկատմամբ: Մինչ այդ լարված պայքարում Ասլանյանը 5:3 հաշվով առավելության էր հասել ադրբեջանցի Էլման Մուխտարովի նկատմամբ:
Թիմային հաշվարկում Հայաստանի ազգային հավաքականը զբաղեցրել է 4-րդ հորիզոնականը: Առաջին տեղում է Ռուսաստանը, որին հաջորդում են Վրաստանը և Ադրբեջանը:
Ինչևէ, Արթուր Ալեքսանյանն ու Մաքսիմ Մանուկյանը վերջին տարիների հայաստանցի ամենատիտղոսակիր մարզիկներն են: Եթե Ալեքսանյանին կարելի է անվանել կենդանի լեգենդ, ապա Մանուկյանի մուտքը կամ վերադարձը հայկական սպորտ ավելի քան տպավորիչ էր: Նրա առաջին նշանակալի նվաճումը աշխարհի առաջնության ոսկե մեդալն էր, որին հաջորդեց նաև Եվրոպայի չեմպիոնի տիտղոսը: Հիշեցնենք, որ Մաքսիմ Մանուկյանն ու Արթուր Ալեքսանյանը աշխարհի չեմպիոն էին դարձել անցյալ տարի Փարիզում:
Եվրոպայի առաջնությունը լուսաբանող ռուս լրագրող Ստանիսլավ Չուրան «Առաջին լրատվական»-ի հետ զրույցում նշեց, որ ի դեմս Մանուկյանի և Ալեքսանյանի՝ Հայաստանն ունի համաշխարհային մակարդակի ըմբիշներ: «Ես վստահ եմ, որ այս տղաները դեռ շատ մեդալներ են նվաճելու Հայաստանի համար: Նրանց պետք է աչքի լույսի պես պահել, քանզի Հայաստանի պես փոքր երկրի համար նման մարզիկները ազգային հարստություն են: Այսօր Հայաստանն աշխարհի ուշադրության կենտրոնում է: Ձեր երկրում ժողովուրդը նախանձելի հաղթանակ տարավ: Այդ հաջողությունը շարունակվեց նաև Ռուսաստանում՝ Մանուկյանի և Ալեքսանյանի շնորհիվ: Վստահ եմ, որ հայ մարզիկները այսուհետև ավելի հաջող են ելույթ ունենալու միջազգային ասպարեզում, քանզի ներկայացնելու են հաղթանակած ժողովրդին:
Առաջնության ընթացքում շատ էր խոսվում Հայաստանի և Ադրբեջանի պատվիրակությունների միջև հնարավոր լարվածության մասին: Պետք է արժանին մատուցել կողմերին փոխադարձ հարգանքի համար: Առաջնությունում առաջատարը Ռուսաստանն է, որին հաջորդում են Վրաստանը, Ադրբեջանը և Հայաստանը: Անկախ ամեն ինչից՝ խորհրդանշական պետք է համարել, որ հարևան երկրները եվրոպական ըմբշամարտում դոմինանտի դերում են: Հայաստանը, ինչպես նաև թվարկված մյուս երկրները ըմշամարտի հզոր դպրոց ունեն: Սրտանց ուրախ եմ մեր Հայաստանի և մյուս բարեկամ երկրների հաջողությունների համար»,- նշեց Չուրան:
Կասպիյսկում տեղի ունեցած առաջնությանը Հայաստանը ներկայացրել են նաև Սլավիկ Գալստյանը, Կարապետ Չալյանը, Արթուր Շահինյանն ու Արման Մելիքյանը: Գալստյանը 1/4 եզրափակչում 2:6 հաշվով զիջել էր Մոլդովան ներկայացնող Դոնիոր Իսլամովին, իսկ Չալյանը 3:6 հաշվով՝ Շվեդիայի ներկայացուցչին: Արթուր Շահինյանը 1/8 եզրափակիչում 1:9 հաշվով պարտվել էր ռուսաստանցի Օզդոևին: Արմեն Մելիքյանն էլ քառորդ եզրափակչում 4:12 հաշվով պարտվել էր վրացի Դաթո Չխարտիշվիլիին:
