Վանաձորում ավագանու առաջին նիստը բոյկոտելու վերաբերյալ «Առաջին լրատվական»- ի հետ զրույցում ԱԺ պատգամավոր, «Լուսավոր Հայաստան» կուսակցության նախագահ Էդմոն Մարուքյանը նշեց. «Խայտառակ ընտրություններից հետո հայտարարել էինք, որ բոյկոտելու ենք ավագանու նիստերը և այդ մոտեցումը պահպանվում է»:
Էդմոն Մարուքյանի կարծիքով՝ եթե ՀՀԿ-ն մեծամասնություն ունենար Վանաձորի ավագանիում, ապա որևէ խնդիր չպետք է ունենար: Նրա խոսքով՝ ընդդիմադիր խմբակցությունների գոնե երկու ավագանու անդամի չեն կարողացել համոզել, որ մասնակցի ավագանու նիստին. «Եթե ճնշումներ ու մանդատագողություն չլիներ, այդ մարդիկ վաղուց հայտարարած կլինեին, որ իրենք են ընտրել, այդպես են ճիշտ գտել, բայց այդպիսի բան չկա, բոյկոտ է տեղի ուենում, դա նշանակում է, որ ՀՀԿ-ն ինչ-որ ճնշումների արդյունքում կարողացել է գնալ «одноразовый» էֆեկտի և հավելեց, որ երբ որ «զոռբայությունով մարդիկ ինչ-որ տեղեր են զբաղեցնում, պետք է հետևանքների մասին մտածեն»:
Էդմոն Մարուքյանը նաև նշեց, որ բոյկոտ հայտարարելով՝ իրենք նաև պաշտպանում են Վանաձորի քաղքապետարանի աշխատակազմի այն անդամներին, որոնց ստիպել են աշխատանքից ազատվելու դիմում գրել:
Վանաձորում այս օրերին քարոզարշավ է սկսվել ավագանու ընդդիմադիր անդամների դեմ: «Սակայն մարդիկ գալիս են մեր գրասենյակներ և ասում՝ պահե՛ք ձեր դիրքորոշումը»,- հավաստիացրեց Մարուքյանը:
«Չար ծառը բարի պտուղ չի կարող տալ,- ընդգծեց Է. Մարուքյանը: – եթե զոռբայությունով, կեղծիքի ու ճնշումների ճանապարհով եկել ես, սենյակ ես զբաղեցրել, դեռ չի նշանակում, որ կարող ես մի լավ բան անել կամ քաղաքը կառավարել:
Մանրամասները՝ տեսանյութում:
