Մարդու իրավունքների եվրոպական դատարանը (ՄԻԵԴ) դիմել է Թուրքիայի իշխանություններին՝ կոչ անելով բարեփոխել ազգային օրենսդրությունը, որպեսզի արգելվի ավելորդ ուժի, այդ թվում՝ արցունքաբեր գազի կիրառումը խաղաղ ցուցարարների հանդեպ: Եվրոպացի դատավորները համանման որոշում են կայացրել Ստամբուլի բնակչուհու հայցի քննությունից հետո, ով 2006թ. մասնակցել է Կանանց միջազգային օրվան նվիրված ցույցին, որն ավարտվել է ոստիկանության հետ բախումներով: Դիտելով բախումների ականատեսների տեսանյութերը՝ դատավորները նշել են, որ իրավապահ մարմինները ցուցարարներին ցրվելու կոչ չեն արել, այլ միանգամից արցունքաբեր գազ են կիրառել:
Դատարանը վճռել է, որ Թուրքիայում արցունքաբեր գազի կիրառման հստակ ցուցումների բացակայությունը հանգեցնում է ոստիկանության կողմից նման միջոցների չարաշահման: Դատավորները նաև ուշադրություն են դարձրել այն հանգամանքի վրա, որ թուրքական իրավապահ մարմինների աշխատակիցները թաքցրել են իրենց դեմքերը և նշանները, որպեսզի նրանց չճանաչեն հետագա դատական գործընթացներում:
Ստրասբուրգի դատարանում հիշեցրել են, որ ավելի վաղ քննարկվել են ավելի քան 40 համանման դեպք՝ «ընդդեմ Թուրքիայի»: Դրանց մեծ մասում ապացուցվել է թուրքական քննչական մարմինների մեղքը: Դատարանը դեռևս պետք է քննի շուրջ 130 գործ, որոնք վերաբերում են Թուրքիայում հավաքների ազատությունների իրավունքին:
Դատարանը խնդրել է միջոցներ ձեռնարկել՝ ապագայում խախտումներից խուսափելու համար: Կողմերից մեկն առաջիկա երեք ամիսներին կարող է բողոքարկել վճիռը:
Եվրոպական դատարանը վճռել է հայցվորին վճարել 20 հազար եվրո՝ որպես բարոյական վնասի փոխհատուցում: