Բանանցի մակեդոնացի պաշտպան Վլատկո Դրոբարովը հուլիս ամսից է հանդես գալիս երևանյան թիմի կազմում: Ակումբի մամուլի ծառայության թղթակցի հետ զրույցում Դրոբարովը ամփոփել է այդ ժամանակահատվածը՝ գրում է թիմի պաշտոնական կայքը:
«Սկզբնական հատվածում ամեն ինչ չէր, որ ստացվում էր ինձ մոտ՝ կապված տարբեր հանգամանքների հետ, սակայն տարվա վերջին հատվածն ու այս տարվա սկիզբը հաջող է ստացվում, ինչի համար ես շատ ուրախ եմ: Կարծում եմ, որ ձմռան ընթացքում կատարված աշխատանքն է տալիս իր արդյունքը: Ես հավատում էի, որ կարող էինք հաղթանակներ տանել մեկնարկային երկու տուրերում: Ցավոք, պարտություն կրեցինք գավաթային խաղում, մեր բախտը չբերեց, սակայն գավաթային դիմակայությունը բաղկացած է 180 րոպեից, և միայն ժամանակի կեսն է դեռ անցել:
Ես շատ ուրախ եմ, որ երեք մակեդոնացի կա «Բանանց»-ում: Բոլորն էլ գիտեն, թե որքան արժեքավոր է, երբ արտասահմանում ես գտնվում ու այնտեղ հանդիպում ես քո հայրենակցին:
Ես խաղացել եմ Մեքսիկայի երկրորդ դիվիզիոնում և այնտեղ պայքարն ու արագությունները շատ ավելի ուժեղ էին, իսկ Մակեդոնիայի առաջնությունում գրեթե նույն մակարդակն է, ինչ Հայաստանում: Մեքսիկայի երկրորդ դիվիզիոնը ինձ վրա ուժեղ տպավորություն գործեց:
Երբ տիտղոս ես նվաճում, զգացողություններն աննկարագրելի է: Դա չէի փոխանակի միլիոն դոլարի հետ: Շատ եմ ցանկանում նաև նմանատիպ տիտղոս(Վլադկո Դրոբարովը Մակեդոնիայի գավաթակիր է-խմբ.) նվաճել Հայաստանում»,- ֆուտբոլիստի խոսքն է փոխանցում թիմի պաշտոնական կայքը:
Լուսանկարը՝ «Բանանց»-ի պաշտոնական կայքի:
