ՀՀ կապի ու տրանսպորտի փոխնախարար Արթուր Առաքելյանը, այսօր կառավարության նիստից հետո լրագրողների հետ զրույցում անդրադառնալով Տուլայում Մոսկվա-Երևան ավտոբուսի վթարին, տեղեկացրեց, որ Հայաստանում գործում են կանոնավոր և ոչ կանոնավոր ուղևորափոխադրումներ. Տուլայի ավտոբուսը գործել է ոչ կանոնավոր տարբերակով:
«Ոչ կանոնավոր ուղևորափոխադրումները նրանք են, երբ վաճառվում է տոմսը, ուղևորը նստում է մեքենան ու ուղևորվում: Մինչդեռ կանոնավոր ուղևորափոխադրումները ավտոկայանից են արվում, ուր գործում են համապատասխան ենթակառուցվածքներ, վարորդները պարտադիր բժշկական ստուգում են անցնում, կա կանոնավոր չվացուցակ, և ուղևորը գիտի, թե որտեղ և քանիսն են լինելու կանգառները և թե երբ է ինքը հասնելու իր ուզած վայրը։ Ուղևորվելուց հետո ամբողջ ընթացքում վերահսկողություն է լինում, թե չվերթը ինչ վիճակում է գտնվում, կամ ինչ խնդիրներ կան»,-ասաց նա:
