Հայաստանում Ֆրանսիայի դեսպան Օլիվիե Դըկոտինյին Ազատություն ռադիոկայանի հետ հարցազրույցում բավականին ուշագրավ ակնարկ է արել Միացյալ Նահանգների հասցեին: Ռադիոկայանի հարցին, թե՝ ի վերջո Ադրբեջանում Ֆրանսիայի դեսպանը վերադարձե՞լ է Բաքու՝ ինչպես նշում են ադրբեջանական լրատվամիջոցները, թե՞ Փարիզում է, տվել է անգամ դիվանագիտական հռետորաբանության համար բավականին թափանցիկ ծակող պատասխան: Նա նշել է, թե կարող է հաստատ ասել մի բան, որ Ֆրանսիայի դեսպանը Շուշիում չէ: Իսկ բանն այն է, որ ընդամենը երկու օր առաջ Շուշիում էր Բաքվում ԱՄՆ դեսպանը:
Ընդ որում, ԱՄՆ դեսպանի այցը ոչ միայն առաջինն էր 44-օրյա պատերազմից հետո՝ թե Շուշի, թե Ադրբեջանի զբաղեցրած տարածքներ, այլ ըստ էության հաջորդեց նույն դեսպան Լիբբի՝ դրանից երկու օր առաջ արած մի հայտարարության, թե ինքը չի ուզում Շուշի այցելել եւ դառնալ ինչ որ շոուի մաս, այլ կգնա՝ երբ ժամանակը գա: Ու հանկարծ, երմուը օր հետո դեսպանը տիկնոջ հետ գնաց Շուշի: Եվ ահա, Հայաստանում Ֆրանսիայի դեսպանը հայտարարելով, թե չգիտե՝ իր գործընկերը վերադարձե՞լ է Բաքու, թե Փարիզում է, այդուհանդերձ հայտարարում է, որ կարող է հաստատ ասել մի բան, որ Շուշիում չէ:
Ակնարկը առավել քան պարզ ու թափանցիկ է, ու առաջացնում է հարց՝ արդյո՞ք Ֆրանսիայի համար այդքան զգայուն է եղել ԱՄՆ դեսպանի այցը Շուշի: 44-օրյա պատերազմից հետո Մինսկի խմբի համանախագահ երկրների դեսպանները տեւական ժամանակ չէին այցելում Շուշի: Սակայն, այդ «մորատորիումը» առաջինը խախտեց Ռուսաստանի դեսպանը: ԱՄՆ ու Ֆրանսիայի դեսպանները տեւական ժամանակ պահպանում էին այն, բայց, երկու օր առաջ փաստորեն խախտեց նաեւ ԱՄՆ դեսպանը:
Ընդ որում, հաշվի առնելով իր իսկ արած հայտարարությունը, հնարավոր է եզրակացնել կամ առնվազն դիտարկել, որ այդ այցը եղել է անսպասելի շրջադարձի արդյունք: Եվ հարց է առաջանում, թե արդյո՞ք հենց այդ անսպասելիությունն է «խոցել» Ֆրանսիային, որի դեսպանը Հայաստանում բավականին թափանցիկ ակնարկ է անում Նահանգների հասցեին: Կարո՞ղ է արդյոք դա լինել պարզապես դիվանագետի պահի տակ արված արտահայտություն, առանց այսպես ասած քաղաքական պլանավորման: Ի վերջո, դեսպաններն էլ մարդ են եւ նրանց ամեն արտահայտություն չէ, որ կարող է նշանակել քաղաքական մեսիջ:
Բայց, այդուհանդերձ, դա արդեն կնշանակի վրիպում: Հետեւաբար, Հայաստանում Ֆրանսիայի դեսպանը կամ վրիպում է թույլ տվել Նահանգների հասցեին, կամ էլ Ֆրանսիան իրապես ունի դժգոհոււթյուն, որտեղ իհարկե Շուշի այցը միայն առիթ է, իսկ բուն խնդիրը հանգամանքներն են, որ բերել են այդ այցին: Արդյո՞ք Փարիզը Շուշի «չայցելելու» քաղաքական «նշաձողի» իջեցումը դիտում է որպես Ադրբեջանի՝ Ֆրանսիայի հանդեպ հավակնոտ եւ մարտնչող քաղաքականության աջակցություն Վաշինգտոնից: