«Կլասիկո»-ներն անկասկած մրցաշրջանի կենտրոնական հանդիպումներն են` անկախ նրանից , թե «Ռեալ»-ն ու «Բարսա»-ն ինչ դիրք են զբաղեցնում Իսպանիայի առաջնության մրցաշարային աղյուսակում: Եթե նկատի ունենանք, որ առաջին հանդիպումն ավարտվել էր թիմերից մեկի խոշոր հաշվով հաղթանակով, և «Ռեալ»-ի հաղթանակի դեպքում կրկին կարող էր սրվել չեմպիունության համար պայքարը, ապա նախապես թերագնահատել այս հանդիպման արժեքը պարզապես անհնար էր:
Մոուրինյոն հաշվի էր առել նախորդ հանդիպման սխալներն ու 3 հենակետային կիսապաշտպան էր խաղադաշտ դուրս բերել. այդ գոտում Ալոնսոյին ու Հեդիրաին էր միացել Պեպեն:
Կենտրոնական գծի հագեցվածությունն իր արդյունքը տվեց: Երեք հենակետայիններն էլ բավական լավ խաղ ցուցադրեցին, սակայն դրանից որոշակիորեն տուժեց «արքայական» ակումբի հարձակման գիծը. նրանք երեքն էլ զբաղված էին կատալոնացիների գրոհները կանխելու գործով:
«Բարսելոնա»-ն` չդավաճանելով սեփական խաղաոճին, տիրում էր գնդակին, մեկ հարձակման ժամանակ մինչև 35 փոխանցում կատարում ու հարմար առիթի դեպքում միանգամից սրում խաղը: «Ռեալ»-ը ավելի շատ պաշտպանվում էր ու հույսը դրել էր հակագրոհների վրա, որոնք իդեպ` բավականին վտանգավոր էին:
Թվում էր` «Ռեալ»-ի համար խաղն այնքան էլ վատ չի դասավորվոլ, սակայն 52-րդ րոպեին Ալբիոլը սեփական տուգանային հրապարակում դիրքը պարտվեց Վիլյաին ու ստիպված խախտեց կանոնները: Մրցավարը նշանակեց 11-մետրանոց հարված ու պաշտպանին հեռացրեց խաղադաշտից: Մեսսին անվրեպ իրացրեց 11-մետրանոցն ու առաջ մղեց իր թիմին:
Գոլից հետո մոտ 15 րոպե «արքայական» ակումբն ուշքի չէր գալիս և կատալոնացիները հաշիվը կրկնապատկելու մի քանի լավ հնարավորություն կորցրին, ինչի համար շուտով պատժվեցին: 82-րդ րոպեին Դանի Ալվեշը Մարսելոյի հետ պայքարում խախտեց կանոններն ու մրցավարը կրկին նշանակեց 11-մետրանոց հարված, այս անգամ արդեն կատալոնացիների դարպասին: Ռոնալդուն ոչ մի շանս չտվեց Վալդեսին` 1:1:
Հանդիպման վերջնամասում թիմերը կրկին ջանքեր չէին խնայում և ամենևին էլ չէր զգացվում, որ նրանցից մեկը 10 հոգով է խաղում: Ինչևէ, նոր գոլեր չգրանցվեցին: Հավասար պայքարում անցած խաղում գրանցվեց հավասար արդյունք: Սպասենք հաջորդ «կլասիկո»-ին:
szólj hozzá: Real Madrid 1-1 Barcelona