«Կուբան»-ի ու Հայաստանի ազգային հավաքականի ֆուտբոլիստ Արազ Օզբիլիսը հայտարարել է, որ իր թիմը մտադիր է եվրագավաթների խաղարկություններին մասնակցել:
– Առաջնության առաջին հատվածում ձեզ հաջողվեց լավ արդյունք ցույց տալ ու միավորների լավ պաշար հավաքել: Զարմացած չե՞ք, որ ձեզ հաջողվեց հասնել այս արդյունքին.
– Բարդ հանդիպումներ ունեցել ենք, բայց և այնպես զարմանալու առիթ չեմ գտնում: Կարծում եմ՝ ունենք այնքան հզոր թիմ, որ կարող էինք զբաղեցնել այն տեղն առաջնությունում, որը հիմա զբաղեցնում ենք: Լավ թիմ ունենք, կոնկրետ խաղաոճ, անհատապես լավ պատրաստված ֆուտբոլիստներ:
Ինչո՞ւ չպետք է զբաղեցնեինք բարձր տեղ. չէ՞ որ թիմում բոլորը նման կերպ են տրամադրված, որ պետք է որքան հնարավոր է առաջ գնալ: Չեմ կարող ասել, որ սա հաճախ ենք քննարկման առարկա դարձնում, բայց այն, որ բոլորս էլ միտված ենք լինել առաջատարների կողքին ու չզիջել նրանց, քննարկման ենթակա չէ: Բոլորս ենք ցանկանում հանդես գալ եվրագավաթներում:
Այո´, Ռուսաստանում կան ուժեղ թիմեր, բայց հաշվի նստելով առաջնության առաջին շրջանին կայացած խաղերի հետ՝ չեմ կարող առանձնացնել մի թիմ, որին մենք զգալիորեն զիջում ենք: Այո´, մեր դեմ խաղում հրաշալի խաղաց ԲԿՄԱ-ն, բայց արդարության համար նշեմ, որ ուղղակի դա մեր օրը չէր: Երբ վստահ ենք հանդես գալիս, կարողանում ենք հաղթել բոլորին. սա´ է Ռուսաստանի առաջնության հետաքրքրությունը:
– Երբ Պետրեսկուն հեռացավ թիմից, ֆուտբոլիստներն ասացին, որ ուզում են ապացուցել, որ այն արդյունքները, որ թիմն է ցույց տվել, միայն մարզչից կախված չէին, այլև հենց իրենցից՝ ֆուտբոլիստներից.
– Կարևորագույնն այն է, որ մենք ցանկանում ենք ապացուցել, իսկ դրա վառ ապացույցն այն է, որ մրցաշարային աղյուսակի առաջին վեցյակում ենք: Ժամանակը ցույց կտա: Դեռ երկար ժամանակահատված ունենք հաղթահարելու: Կարող եմ փաստել, որ չնայած մարզչի հեռանալուն՝ թիմը հանգստություն է պահպանում:
