Այսօր Չեխիայի Հանրապետությունում մեկնարկում է նախագահական ընտրությունների առաջաին փուլը: Երկրի ողջ տարածքում ընտրատեղամասերը կբացվեն տեղի ժամանակով ժամը 14:00-ին (Երևանի ժամանակով 17:00) և կավարտվեն շաբաթ՝ ժամը 22:00-ին (Երևանի ժամանակով ժամը 01:00): Այս մասին հայտնում է ITAR-TASS-ը:
Պաշտոնապես գրանցված է 9 թեկնածու, որից 3-ը կանայք են:
Հունվարի սկզբին անցկացված հասարակական կարծիքի հարցումները վկայում են, որ նախագահական ընտրապայքարի առաջնորդներն են երկու նախկին վարչապետերը:
Միլոշ Զեմանը, որն առաջադրվել է իր ստեղծած «Քաղաքացիների իրավունքների կուսակցությունից», առաջին փուլում կստանա ձայների մոտ 25 տոկոսը, իսկ նրա գլխավոր մրցակից, որպես անկախ թեկնածու գրանցված Յան Ֆիշերը՝ավելի քան 20 տոկոսը: Նրանց հաջորդում է ընդդիմադիր թեկնածու Իրժի Դինստբիրը (13 տոկոս) ՝ սոցիալ-դեմոկրատական կուսակցությունից:
Ինչպես ցույց են տալիս վարկանիշները, մյուս 6 թեկնածուները դժվար թե կարողանան 10 տոկոսից ավելի ձայն հավաքել:
Եթե թեկնածուներից որևէ մեկը չկարողանա ստանալ ձայների 50 տոկոսից ավելին, հունվարի 25-ին և 26-ին կանցկացվի երկրորդ փուլը:
Այս ընտրությունները առաջին համաժողովրդական նախագահական ընտրություններն են Չեխիայում: Մինչ այս նախագահին ընտրում էին օրենսդիրները՝ խորհրդարանի երկու պալատների նիստում:
Չեխիայում նախագահն ընտրվում է 5 տարի ժամկետով: