«2012-ը գերազանց տարի չէր, քանի որ մենք Օլիմպիական խաղերին ունեցանք մեկ բրոնզե մեդալ, որը նվաճեց Հռիփսիմե Խուրշուդյանը, բայց ի վիճակի էինք ունենալու եթե ոչ երկու ոսկե, գոնե երկու արծաթե մեդալ: Այդ արդյունքներին կարող էին հասնել Տիգրան Մարտիրոսյանն ու Մելինե Դալուզյանը: Մենք իսկապես պատրաստ էինք:
Բայց հայտնի պատճառներով Տիգրանը վերջին պահին վնասվածք ստացավ, իսկ Մելինե Դալուզյանը, ով շատ լավ մարզավիճակում էր, չկարողացավ լավ հանդես գալ: Ընդհանուր առմամբ գնահատում եմ բավարար, քանի որ տարեվերջին երիտասարդների, պատանիների ստուգատեսների բազում մեդալներ ունեցանք»,- 1in.am Sport-ի հետ զրույցում նշեց ծանրամարտի կանանց Հայաստանի ազգային հավաքականի գլխավոր մարզիչ Արտաշես Ներսիսյանը:
«Մելինեն հոգեբանական խնդիրներ ուներ: Նա կարող է շատ հզոր լինել մարզումներին, բայց մրցումներ ժամանակ հոգեբանական խնդիրներ է ունենում, որն ամեն ինչ փչացնում է: Այդ խնդիրը պետք է լուծվի հոգեբանի հետ միասին:
2013-ից մեծ սպասելիքներ չունեմ: Մրցումներին պետք է մասնակցենք և փորձենք հաջողության հասնել, բայց պետք է նաև խոստովանեմ, որ ներկայումս չունենք բազմաթիվ հզոր ծանրորդուհիներ: Սակայն վստահ եմ, որ 2014 թվականին կունենանք հրաշալի թիմ և հաջորդ Օլիմպիադային ավելի լավ կմասնակցենք, քան Լոնդոնի Օլիմպիադային:
Կան 15-20 ծանրորդուհիներ, որոնց միջև կանենք ընտրություն: Ամանորը միշտ դիմավորել եմ Հայաստանում և ընտանիքիս անդամների հետ: Ամենաշատը ցանկանում եմ կապույտ երկինք և խաղաղություն հայ ժողովրդին: Մաղթում եմ առողջություն ամբողջ ազգին, նպատակների իրականացում: Շնորհավոր մեր ամբողջ ազգի Նոր տարին»:
