ԱՊՀ երկրները դժվար թե ցանկանան միանալ Եվրասիական միությանը: Ամերիկյան Կոնգրեսում այսպիսի կարծիք է հայտնել ԱՄՆ արտաքին քաղաքականության գլխավոր գաղափարախոս Զգիբնև Բժեզինսկին:
Նրա խոսքերով՝ այն երկրների թիվը, որոնք կցանկանան միանալ Եվրասիական միությանը, շատ չէ:
Բժեզինսկու կարծիքով՝ Ուկրաինան Ռուսաստանին թույլ չի տա տիրել իր տարածքում, նույնը և Բելառուսը:
«Վրաստանն ավելի շատ է հակված Ռուսաստանի հետ համագործակցության, սակայն դա ԱՄՆ-ի հետ ընկերության և «Բաքու-Ջեյհան» նավթատարի հաշվին կլինի»,- նշել է նա, ապա հավելել. «Ինչ վերաբերում է Յանուկովիչին, նա չի ցանկանում ուրիշ հանցախմբի իր տարածք թողնել»:
«Նոր ԽՍՀՄ»-ին միանալու ավելի քիչ պատճառներ ունեն Միջին Ասիայի երկրները: «Ղազախստանը՝ Նազարբաևի ղեկավարությամբ, մանևրում է Ռուսաստանի և Չինաստանի միջև, ինչպես նաև ամբողջ աշխարհի հետ: Իսկ Ուզբեկստանը շատ հաստատակամ է պետական անկախության հարցում»,-ասել է Բժեզինսկին:
Ինչպես տեղեկացվում է, դեկտեմբերի 5-ին Աշգաբադում կայացած ԱՊՀ երկրների գագաթնաժողովի շրջանակներում Ուկրաինայի նախագահ Վիկտոր Յանուկովիչը ՌԴ նախագահ Վլադիմիր Պուտինի հետ հանդիպման ժամանակ ասել է, որ Ուկրաինան պետք է միանա Մաքսային միությանը, որի որոշ դրույթներ անմիջապես վերաբերում են Ուկրաինային և նրա ապրանքներին: «Մենք շատ լավ ենք հասկանում, որ եթե չհամագործակցենք Մաքսային միության հետ, ապա շատ բան կկորցնենք, որը Ուկրաինայի տնտեսության համար անթույլատրելի է»,- ասել է Ուկրաինայի նախագահը: