Թուրքական Doğan լրատվական գործակալության հաղորդմամբ, վարչապետ Էրդողանի գլխավորած «Արդարություն և զարգացում» կուսակցությունը (ԱԶԿ) պատրաստվում է հունիսի 12-ին կայանալիք խորհրդարանական ընտրությունների համար առաջադրել թուրք անվանի ֆուտբոլիստ, ՈՒԵՖԱ-ի գավաթակիր Հաքան Շուքյուրի թեկնածությունը:
Վերջինս առաջադրվելու է Ստամբուլի 3-րդ ընտրատարածքից։ Հաջողության հասնելու նրա շանսերը բավականին բարձր են գնահատվում:
Նմանատիպ պատվի է արժանացել նաև Թուրքիայի ազգային ընտրանու մեկ այլ նախկին խաղացող՝ Թանժու Չոլաքը, որի թեկնածությունը, ամենայն հավանականությամբ, կառաջադրվի Իզմիր քաղաքից:
Հիշեցնենք, որ Հաքան Շուքյուրը ծնվել է 1971 թվականի սեպտեմբերի 1-ին Սաքարիայում: Իր պրոֆեսիոնալ մարզական կարիերայի ընթացքում (1987-2008) խաղացել է թուրքական «Սաքարիասփոր», «Բուրսասփոր», «Գալաթասարայ», իտալական «Տորինո», «Ինտեր (Միլան)», «Պարմա» և անգլիական «Բլեքբըրն» ակումբներում:
Ակումբային մակարդակով ամենամեծ հաջողության հասել է «Գալաթասարայ»-ի կազմում հանդես գալիս (392 խաղ, 228 գոլ)` 1999/2000 մրցաշրջանում հաղթելով ՈՒԵՖԱ-ի գավաթում և դառնալով դրա գլխավոր ռմբարկու: Շուքյուրը Թուրքիայի առաջնությունների ութակի չեմպիոն է, հնգակի գավաթակիր, նաև՝ Իտալիայի գավաթակիր (Պարմայի կազմում):
Ազգային ընտրանու մակարդակում ամենամեծ հաջողությունը գրանցվել է 2002 թվականին Ճապոնիայում ու Հարավային Կորեայում տեղի ունեցած Աշխարհի առաջնության ժամանակ, երբ Թուրքիայի ընտրանին տիրացավ բրոնզե մեդալի: Ի դեպ, Շուքյուրն այնտեղ դարձավ Աշխարհի առաջնությունների պատմության ընթացքում ամենավաղ գոլը (հանդիպման 10.8-րդ վայրկյանին) հեղինակած ֆուտբոլիստ:
Ընդհանուր առմամբ, Հաքան Շուքյուրը, 1992-2007 թվականներին հանդես գալով Թուրքիայի ազգային ընտրանու կազմում, մասնակցել է 112 հանդիպման և խփել 51 գնդակ: Մասնակցել է նաև 1996 և 2000 թվականներին տեղի ունեցած Եվրոպայի առաջնություններին:
Անհատական ցուցանիշների առումով հարկ է նշել, որ Հաքան Շուքյուրը Թուրքիայի առաջնությունների (Սուպերլիգա) և եվրոգավաթների հանդիպումներում ամենաշատ աչքի ընկած թուրք ֆուտբոլիստն է (համապատասխանաբար` 249 և 38 գոլերով):